Nongstoiñ, Risaw 10: Ban bud ryntih ïa ka hukum kaba la pynmih da ka Sorkar Meghalaya lyngba ka shithi No.DCA.33/2012/520 dt.19.09.2023 bad ban pyndam noh ïa ka hukum jong kane ka ophis kaba la pynmih hashuwa kata lyngba ka shithi No.NDG.3 13/2022/3 12, dt. 19.09,2023, da ka jingthmu ban ïada ïa ka suk ka saiñ jong u paidbah, ka long kaba donkam ban pynmih da kawei pat ka hukum kaba don ïa ki kyndon kaba ïadei bad ka jingaijingbit ban pynlong ïa ki ‘Jingïakop Khwai Dohkha’, kiba hap hapoh ka jingkhmih jong ki bor synshar distrik ka West Khasi Hills District. Kino kino ki Riew Shimet/ Ki Kynhun/ Ki Seng/ bad kiwei kiwei ki dei ban bud ryntih bad kohnguh ïa kine ki jingbthah kiba donkam
La ong ba tang u Deputy Commissioner, West Khasi Hills District, Nongstoiñ u ba don ka bor bad u ba lah ban ai jingbit na ka bynta ban pynlong ïa kino kino ki ‘Jingïakop Khwai Dohkha’ kiba hap hapoh West Khasi Hills District.
Kino kino ki Riew Shimet/ Ki Kynhun/ Ki Seng bad kiwei kiwei kiba kwah ban pynlong ïa ki jingïakop khwai dohkha, ki dei ban pyndap pura ïa ki aplikeshon form ryngkat bad ki kot donkam ban pynshisha ïa kita ki jingkyrpad jong ki, kata ka ‘Clearance Certificate’ na U Superintendent of Police, West Khasi Hills District, Nongstoiñ, kaba don ïa ki jingthoh kum ka tarik bad ka por ban pynlong ïa ka jingïakop, ka jingheh jingrit jong ka pung ka dei ban don ka jaka pynieng kali kaba biang ryngkat bad ki volunteer kiba ïoh jinghikai, ka rukom pynïaid kali kaba janai bad ban nym don kano kano ka huri hura ha ka por ba pynlong ïa ka jingïakop khwai dohkha.
Nangta, ka NOC na u Superintendent of Taxes, West Khasi Hills District, Nongstoiñ katkum ka shithi No. ST/WKH/NG-207/2023-24/193 dt.1/09/2023 kaba la pynmih da U Commissioner of Taxes, Sorkar Meghalaya. Ka NOC na U SE/EE PWD (Roads) West Khasi Hills District, lada kata ka jaka ban pynlong ïa ka jingïakop khwai dohkha (Pung/ Nan/ Wah) ka jngai kumba 500 metre na ki surok Highway lane surok PWD.
Ka NOC na U Sordar Shnong ne Rangbah Shnong. Ka NOC na U/Ka Trai Pung lada dei ka pung shimet. Ka NOC na ki bor ba dei khmih lada jia ba dei ka Pung lane Nan paidbah. Ka NOC U Sordar Shnong ne Rangbah Shnong bad na ka KHADC lada jïa ba kadei ka Wah Paidbah. Ka NOC na U Superintendent of Fisheries, West Khasi Hills District, Nongstoiñ. Ka NOC na U SE/EE PHE & DSBM West Khasi Hills District na ka bynta ki jaka leit bar kum ka Solid/Plastic waste bad Bio-Toilet.
Ki nongpynlong ïa ki jingkop khwai dohkha, la kidei ki Riew Shimet/ Ki Kynhun/ Ki Seng/ bad kiwei kiwei kidei ban pynthikna ba kidei ban bret bha ïa ki jaboh kiba mih na ki plastic, ki jaka leit pynjhieh bad jaka leit bar kiba paka, ban khang pyrshah ïa ka jingdie kyiad bad khalai ha ka jaka ba pynlong ïa ka jingïakop khwai dohkha bad ban pynbiang ruh ïa ki dawai dashin ïoh don kiba kem pang.
Ïa ki application phorm kiba la bïang pura, dei ban leit thep ym duna ïa ka 7 sngi shuwa ban pynlong ïa ki jingïakop khwai dohkha. Ki phorm kiba don jingbakla bad kiba thep duna ïa ka 7 sngi shuwa ban pynlong ïa ka jingïakop khwai dohkha kin shah shah kyntait noh.
Kine ki kyndon kiba thymmai kin treikam noh kumne tad haduh ban da pynmih da kawei pat ka hukum.
