Shillong, Naiwieng 26 : U Working President jong ka Meghalaya State Olympic Association, Bah John F Kharshiiing ba dei ruh u Chairman ka IOA Adhoc Committee jong ka Tripura ryngkat ki arngut ki dkhot ba kynthup ïa u Bamang Tago, Secretary General Arunachal Pradesh Olympic Association bad u Robert R Royte, President Mizoram Olympic Association bad kiwei kiwei ki la leit ban kynduh ïa u Myntri ka tnad Sports ka Sorkar Tripura u Tinku Roy ha kamra treikam jong u ban ïa kren halor ki ishu kiba ïadei bad ki kam ïalehkai ha ika jylla Tripura.
Katkum ka kyrwoh, la ïathuh ba ha katei ka sngi la ïakren kumno haba ïadei bad ka jingjied da ka lynti kaba khuid ïa ki nongïalehkai na bynta ki lympung ïalehkai khamtam na bynta ka 38th National Games 2025 kaban long ha Uttarakhand bad kiwei ki kam ba ïadei bad ka sorkar jylla kiba snohlang bad ki synjuk ïalehkai ha ka jylla Tripura.
Ha kane ka jingïakren, u Myntri u la kular ban ïatrei lang bad ka IOA Adhoc Committee khnang ban plie lad ïa ki samla kiba dei hok na ka jylla Tripura kiba la duh ei ïa ka kabu ksiar ha ki 12 snem ba la dep ban shim bynta ha ki lympung ïalehkai jong ka National Championship ha ka Ri.
La ïathuh ba hadien ba ki la ïoh pdiang ïa katei ka jingkular na u Myntri, ka IOA Adhoc Committee na bynta ka Tripura kan pynbiang pat ïa ka kaiphod bad ban phah ha lane shwa ka 7tarik Nohprah sha ka Dr. PT Usha, President ka Indian Olympic Association ban leh ïa kaba donkam. Kane ka long katkum ka kyrwoh ba la phah da ka ophis treikam jong u Chairman ka IOA Adhoc Committee jong ka Tripura, Bah John F Kharshiing.
