12 tylli ki takma khur ki nongïalehkai Karate ka Jylla na ka FCPL Youth League Karate Championship, Delhi

Shillong, Naiwieing 26 : Ki nongïalehkai karate ka jylla hapoh ka lama jong ka All Meghalaya Karate – do Association ki la ïoh ban khur haduh 12 tylli ki takma na ka lympung ïalehkai jong ka 1st Federation Cup Premier League & Youth League Karate Championship 2024 kaba long ha Talkatora Indoor Stadium, New Delhi naduh ka 17tarik – 23 tarik u Naiwieng 2024.
Kane ka kynhun hapoh ka jingïalam jong u Bah Donboklang Lyngdoh kum u Coach ka la ïoh ban khur lai tylli ki8 takma ksiar, san tylli ki takma rupa bad saw tylli ki takma rnong.
Halor kane ka jingjop, na ka liang ka AMKA ka ai ka jingkitbok ïa kine ki nongïalehkai bad kumjuh ïa ki coach kiba la lah ban wanrah ka burom ïa ka jylla ha kane ka lympung.
Ki nongïalehkai kiba khur ïa ka takma ksiar ki kynthup ïa u Gregorwilson Makdoh ha ka thup Junior Male Individual Kata, nangta u Davyson Kharkongor ha ka Men Individual Kumite -50kg bad u Kynpham Kharkongor ha ka thup Men Individual Kumite -67kg.
Ki nongïalehkai kiba thur ïa ka takma rupa pat ki long u Ram Lanong ha ka thup Junior Male Individual Kumite -55kg, Ferdinand Samkupar Rani ha ka thup Junior Male Individual Kata, Damebanmerbha S. Blah ha ka thup Senior Male Individual Kumite -50kg, Sa-I Banmanmirbha Blah ha ka thup Junior Female Individual Kumite -42kg bad ka Barisha Kharbani ha ka thup Women Individual Kumite -61kg.
Kiba khur takma rnong pat ki long ka Cathy Sweety Nongrum ha ka thup Women Individual Kumite -45kg nangta u Nangkitbok Phira ha ka thup Men Individual Kumite -55kg bad u Gideon Tympuin Men (khur ar tylli ki takma rnong) kata ha ka Individual Kata bad ha ka Men Individual Kumite -55kg.
Kane ka long katkum ka kyrwoh ba phah da u General Secretary ka Synjuk, u Bah Ksan Kupar Warjri.