Ïalam ki samla pule ïa ka kam ban kyntiew ïa ka jingïatylli ha ka ri bad ka Nasha Mukt Bharat

Shillong, Nailar 14: Ka Central Bureau of Communication (CBC), Shillong, Tnad Information and Broadcasting, Sorkar India, ryngkat ka jingïatreilang bad ki bor pynïaid District, Eastern West Khasi Hills, ki la pynlong ïa ka Integrated Communication and Outreach Program (ICOP) halor ka Campaign Har Ghar Tiranga bad ka Nasha Mukt Bharat Abhiyan ha Mairang Presbyterian Higher Secondary School, Mairang. La pynlong ïa ka Tiranga rally kum shibynta jong kane ka prokram, kaba la pynïasoh lang ïa ki samla pule, ki heh sorkar bad ki paidbah ha ka jingrakhe kaba iphuh iphieng ïa ka jingieid ri, ka jingïatylli jong ka ri bad ka jingkitkhlieh ha ka imlang sahlang.
La pynsdang Ïa ka rally da u Additional Deputy Commissioner Bah M. Diengdoh ha ka jingïadonlang u Assistant Director, CBC u Gopajit Das; u Principal Bah C. War; ki ophisar na ka tnad Pulit, ki bor pynïaid distrik bad ka CBC; ki nonghikai, ki paidbah; bad shibun ki khynnah skul kiba la ïashim bynta shitrhem.
Kane ka rally ka la sdang na katei ka skul haduh ka ïew kaba don marjan, ha kaba ki khynnah skul ki la rah ïa ka khubor jong ka Har Ghar Tiranga, ka jingïatylli ha ka jingïar bad ka Nasha Mukt Bharat sha ka imlang sahlang. Ka jingïashim bynta shitrhem jong ki samla pule bad ki paidbah ka la ai ïa kane ka rally ïa ka jingïalang kaba khlaiñ bha ha kaba ïadei bad ka jingïashim bynta ka imlang sahlang bad ka la pynskhem ïa ka bynta jong ki samla ha kaba pynsaphriang ïa ki khubor babha ha ka imlang sahlang.
Kane ka rally ka ban jur ïa ka jingdonkam ban pyni da ka jingsngew sarong ïa ka Lama jong ka Ri kum shibynta ka Campaign Har Ghar Tiranga bad ban rakhe ïa ka mynsiem ieid ri bad ka jingïatylli jong ka ri ha ki jingrakhe ïa ka Sngi Laitluid. Ki khynnah skul ki la ïashim bynta shitrhem ha ka jingïalang, da kaba rah ïa ka khubor jong ka Lama jong ka ri shabar jong ki phyllaw skul bad pynshlur ïa ki paidbah ban ïasnohktilang ha ka campaign.
Haba ai jingkren ha ka jingïalang, u ADC Bah M. Diengdoh u la kyntu ïa ki samla pule bad ki nongshong shnong ban ïashim bynta shitrhem ha ka Campaign Har Ghar Tiranga da kaba wah ïa ka Lama jong ka ri ha ki ïing ki sem, ki skul, ki ophis treikam bad kiwei kiwei ki jaka ba kongsan. U la batai ïa ka Lama jong ka Ri kum ka dak kaba khlaiñ jong ka jingïatylli jong ka India ha ka jingïar bad u la pynshlur ïa ki samla ban don ïa ka mynsiem ieid ri ha ka jingim jong ki kaba man ka sngi bad ban nohsynniang sha ka jingtei ïa ka ri kaba khlaiñ bad kaba ïatylli.
Haba kren halor ka Nasha Mukt Bharat, u Bah Diengdoh u la pynshlur ïa ki samla pule shim ïa ki rai kiba don ka jingbah khlieh bad kiba wan na ka jingsngewthuh. U la kren shaphang ka jingdonkam jong ka jingpynïaid ïa la ka jingim, ka jingktah kaba bha jong ki paralok bad ka jinglong jingman kaba kyrshan ha kaba ïarap ïa ki samla ban sngewthuh ïa la ki jong ki sap. U la kyntu ïa ki samla pule ba kin long ki nongkitkhubor jong ka jingkylla kaba bha bad ban pynsaphriang ïa ka khubor jong ka rukom im kaba koit ba khiah bad kaba lait na u drok hapdeng ki longïing, ki paralok bad ki shnong ki thaw.
U Principal Bah C. War u la ïaroh ïa kane ka sienjam bad u la ban jur ïa ka bynta kaba kongsan jong ki jaka pule ha kaba kyntiew ïa ki samla nongshong shnong kiba don ka jingkitkhlieh, kiba sngewskhem bad kiba sngewthuh ïa ka imlang sahlang. U la kren ruh shaphang ka jingïar jong ka India bad ka jingdonkam ban pynkhlaiñ ïa ka mynsiem jong ka jingïatylli ha ka ri hapdeng ki pateng kiba hadien.
U Resource Person SI E. Marbaniang u la ai ïa ki samla pule ïa ka jingtip kaba bniah shaphang ki jingdih pynbuaid bad ka jingktah ïa ki briew, ki longïing bad ka imlang sahlang. U la batai ïa ki jingma kiba ïadei bad ki jait drok bapher bapher bad u la ban jur ïa ka jingdonkam ban ithuh kloi ïa ki dak bad ban wad ïa ka jingkyrshan ha ka por kaba biang. U la pynshlur ïa ki samla pule ban long kiba husiar, ban kyrshan ïa ki paralok bad ban shim ïa ki rai kiba don jingkitkhlieh kiba ïada ïa ka koit ka khiah, ka jingpule bad ka lawei jong ki.
Ka jingïakop shad ieid ri ka la long ka jingpynbyrngia ha kane ka prokram. Ki samla pule ki la pyni ïa ki jingshad kiba itynnad bad kiba iphuh iphieng kiba rakhe ïa ka jingïatylli, ka jingïar bad ka mynsiem ieid ri jong ka India. Lyngba ka jingrwai, ka jingshad bad ka jingsaiñdur, ki nongïashim bynta ki la pynpaw ïa ka jingieid jong ki ïa ka ri bad ïa ka khubor jong ka jingïatylli ka ri. Ki jingshad ki la ïoh ïa ka jingïaroh na ki paidbah bad ki la wanrah ïa ka jinglong kaba itynnad bad kaba lehkmen ïa ka prokram.
Ha kane ka prokram la pyni ruh ïa ki jingïakop saiñdur bad quiz, kiba la ailad ïa ki samla pule ban ïatreilang bad ki phang pdeng jong ka jingieid ri, ka jingïatylli jong ka ri bad ka India kaba lait na u drok. La pynkup burom ïa ki nongjop bad ki nongïashim bynta da ki khusnam, da kaba pynshlur ïa ka jingïashim bynta kaba kham bun bad pynskhem ïa ki khubor ba kongsan jong ka prokram.
La pynkut ïa ka prokram da ka khubor kaba khlaiñ jong ka jingsngew sarong ïa ka Lama jong ka ri, ka jingïatylli ha ka jingïar bad ka jingkitkhlieh lang ban tei ïa ka ri kaba koit ba khiah bad ka Nasha Mukt Bharat. Ka Tiranga rally bad ki prokram pynsaphriang jingtip bapher bapher ki la pynshlur ïa ki khynnah skul ban rah ïa kine ki khubor na skul jong ki sha ki ïing ki sem bad ki shnong ki thaw jong ki bad ban long ki samla kiba pynsaphriang ïa ka khubor jong ka jingieid ri, ka jinglong babha bad ka jingkitkhlieh ha ka imlang sahlang.