Ïohshimbynta ki nongrep, kiba sengkam lajong bad kiwei de ha ka sngi rakhe laitluid ha Lok Bhavan

Shillong, Nailar 16: Hapdeng ka jingïatylli, ka jingburom ïa ka kolshor bad ka mynsiem aiti, u Lat ka jylla u C. H. Vijayashankar, u la pynlong ïa ka jingïalang kaba khot sngewbha bad pynlong ïa ki prokram bapher bapher kiba ïadei bad ki deiriti kiba la pynlong ha Lok Bhavan, Shillong, ha ka 15 tarik kaba dei ka sngi rakhe laitluid kaba 80 jong ka ri India, kaba kynmaw burom ïa ka jingïaid lynti jong ka ri ha ki jingïakhun laitluid bad ki kam pynroi.
Ha ka prokram kaba kyrpang ha kane ka Amrit Kaal, ha kane ka sngi la sakhi da ka jingdonlang u Myntri Rangbah ka jylla u Conrad K. Sangma, ha ryngkat kiba lashah khot sngewbha, ki heh ophisar, ki shipai bad ki pulit, ki, artist, ki nongmihkhmat na ki kynhun deiriti, kiba shah khot sngewbha bad kiwei kiwei.
Haba sdang ïa ka prokram u Lat ka jylla u la plie ïa ki dukan ba la wanrah ban die ïa ki tiar da ki nongrep, kiba sengkam lajong bad ki artist hapoh phyllaw jong ka Lok Bhavan bad u la jurip ruh ïa ki jingpyninam. Hadien la pynbud sa ka prokram “At Home” ha kaba ka phang ka dei “Colors of India”, kaba la pynkhreh da ka Governor Secretariat ha ka jingïatreilang bad ka tnat Arts & Culture ha kaba la pyni ïa ki jingriewspah jong ka deiriti jong ka India bad Meghalaya wat hapdeng ki jingbun ki jingïapher.
Ha ka prokram la pyni ïa ki jingshad Jogari, Jagarna bad Rouf da ka Jammu & Kashmir Academy of Art, Culture & Languages; ka Bhawai Dance bad jingrwai ka Kalbelia Keshria Balam ba la wanrah da ka West Zone Cultural Centre, Udaipur, Rajasthan; ka “Milke Sare Bandhan Todenge Hum” da ka Karnataka Sangha, Mandya; Ka Shad Mastieh,; ka Wangala Harvest Traditional Folk Dance ki Garo; ka Bharatnatyam presentation of Vande Mataram da Prajna Kashyap na Mysore, Karnataka; Chad Kheit Soh, na Jaiñtia; bad ka jingtem Jazz Band and symphony band ka Assam Rifle bad Assam Regimental Centre Band.
Ha kane ka sngi la pynkup burom ruh ïa ki nongjop na ki kam synniang bapher bapher. Ïa u Bah Lynti Rynghang na Ri Bhoi District la ïoh jingithuh halor ka Woodcraft, ka Kong Norma R. Lakiang na East Khasi Hills District halor ka Bonsai, bad u Dirot Chambugong Marak na West Garo Hills District halor ki jingtem jingput tynrai. Ha ka prokram la pynbna ruh ïa ki nongjop ha ka jingïakob Flower Show, ba kynthup ka King of Flower Show, Queen of Flower Show bad Best Stall, kiba la shah pynkup burom lang.
Ha kane ka sngi da ki hajar ngut ki nongshong shnong ki la ïoh ban leit rung laitluid hapoh ka ïing jong u Lat ban sakhi ïa kiba bun ki jingjia kiba kynthup ïa ki kam tynrai bad ki jinghiar pateng bad kiwei kiwei ki jingpynriam pynbeit pynitynnad ha kane ka jaka.