Ngi la laitluid, hynrei ki rit paid mynta ki im ha ka syier, ym don jingshong shngaiñ, naba mad synshar donbor bad pynïaid ki heh spah

Ka India sha ka jinglaitluid bad ka bynta jong ki Khasi State, ki rit paid. Ka India, ka la ïaid sha ka rta kaba 80 snem ha ka jingïoh jing laitluid jong ka bad katei ka la dei ka jingïaid lynti kaba la maïan, na bynta ka jinglong jingman jong ka India bad kumjuh ha ka jingïadei bad ka ri Khasi hi baroh kawei.
Ha kaba kum kane ka sngi, kaba donkam bha ïa ka India lane ka Delhi, ba kan tip shai, ka long, ba ka jingïoh jinglaitluid ha katei ka por, kam dei satia lyngba ka jingïaleh jong ka Delhi lane ki nongïalam kiba na ri thor, hynrei kawei pa kawei ka thaiñ, ka don la ka jong ka jingïaleh bor bah, ban weng ïa ki British na ka jingsynshar thombor jong ki bad ka ri Khasi, ka don la ka jong ka khana kaba shai bha, halor ka jingïaleh jong ki Syiem Khasi bad ki artylli ki khlawait kiba ngi kynmaw bha, ki dei U Tirot Sing Syiem bad U Woh Kiang Nangbah.
Hynrei kim dei tang kitei ki arngut, ki don shuh sa kiwei pat ki nongïalam, kiba don ha syndah jong ki bad ngi dei ban kynmaw ruh, ba ka jingïaleh na ka bynta ka jinglaitluid jong ki Hima Khasi bad ki Hima Jaiñtia, ka la dei ban dkhat noh ïa ka jingim jong ki arngut ki khlawait, ha kaba u Woh Kiang Nangbah, u ïap ha u dieng phasi, katba U Tirot Sing, u ïap ha Ïing byndi ha Dhaka.
Ka jingïasnoh jong ki Hima Khasi bad ka India, ka dei hadien ka jingïoh jingïaleh laitluid jong ki hi bad hangta ka sa wan, ka jingïateh lok bad ki nongïaleh laitluid jong ka India, ha kaba la ïathuh ba ki don bun ki nongïalam, ba kynthup ïa U Jawaharlal Nehru, U Sardar Vallabhai Patel, kiba la wan khnang sha Shillong ban ïakynduh bad ïa syllok bad ki Nongïalam jong ki Khasi State ha ki snem 1947-48.
Haba ka India, ka la ïoh ïa ka jinglaitluid, kumta kaba ngi dei ban ai burom, ka long ïa ka jingdon bynta jong ki nongïalam kiba wan na la ki jong ki jong ki thaiñ bad ki jaka jong ki, lada dei ki Syiem, lada dei ki Raja lada dei kino kino kiba la wan rah ïa ka jinglong kawei jong ka India, namar ba ka India, kan nym long kumba ka long mynta, lada kam don ka jingïohi jngai jong ki nongïalam kiba ha ki snem jong ka jinglaitluid.
Mynta la ïohi, ba ka sorkar India, ka la leh klet noh ïa kitei ki jingshisha, namar ba ka la khñiot ïa ki bor jong ki Hima, ki District Council, ki sorkar jylla bad ka kwah ba kan kurup lut noh halade bad kane ka dei ka jingñiewbeiñ ïa kito ki nongïalam, kiba pynwandur ïa ka India, kaba mynta lyngba ki jingshah shitom bad lenlade jong ki, ha ka jingïaleh pyrshah ïa ki dohlieh.
Haba phai pat sha pateng kaba mynta watla ha ki por mynshwa ka sorkar Pdeng ka ñiew beiñ ïa ki him, ki district council bad kumta ter ter, hynrei kaba itieng bad ishyrkhei mynta kadei ka leh donbor jong ki heh paid ne ka niam heh paid ha la ka jong ka ri India.
Jan manla ki Sorkar jylla kiba don ka jingeh paid tang jong kawei ka kynhun niam ne ka kynhun jaitbynriew, ki la thaw bad wanrah ïa ki aiñ bapher bapher ban khñiot tyngeh bad thom da ka bor ia ki rit paid bad ki kynhun niam kiba rit, kiba khlem pep kine ruh ki don bynta ha ka jingïakhih laitluid bad kiba la nohsynniang ïa la ka ri lajong.
Kine ki kynhun ne seng niam kiba rit ki la ai bun ki jingshakri ïa ki nongshong shnong ka India kine ki heh paid ne seng niam kiba heh kin lah ban leh khamtam eh ïa ki duk ki suk kiba pang ba shitom bad kiba shah ban beiñ.
Ka India watla ka la ïoh laitluid na ki shah synshar donbor jong kiwei pat ki ri, hynrei ha la ka jong ka ri pat ki nongshong shnong rit paid bad ki kynhun niam ne Balang, watla ka riti synshar ka ri India ka shah ban mane laitluid, hynrei mynta pat ki im ha ka shong syier, ym don jingshngaiñ bad ki don ruh kiba shah beh shnong tang na ka daw ka niam bad ka jingngeit ne ba kynnoh pynkylla niam jubor Nalor kine, mynta pat ki rukom synshar mynta ki la long tang ban pynhun ïa ki katto katne ki heh spah kiba don hapoh ka ri, ym dei shuh ïa ka bha ka miat bad ka roi ka san jong ki nongshong shnong bad ka ri baroh kawei.
Lada ki nongshong shnong kim kyndit bynriew ne ba tang na ka bynta jong ka niam bad ka pisa kin jied biang ïa ki briew kiba leh donbor bad lada long kumne ka India kan sa pra Lyngkhot lyngkhai bad ïoh shim kabu ei da ki ri ba marjan, naba kumba ka long mynta la ïohi ba ka ri China ka la sdang ban mushlia bad tuklar biang ïa ka jylla Arunachal Pradesh da kaba phah ïa ki shipai jong ka ban kyntur bad tam da kaba phah rung ïa ki shipai jong ka shapoh u pud u sam jong ka ri India ha katei ka jylla bad nangta ki jingshah mushlia jong ka ri India hapoh ka Ri Bangladesh, nangta na ka ri Pakistan bad kiwei kiwei ki ri, khamtam ha ka jingjia kaba dang shen jong ka jingthmu ka ïing Dorbar ka ri ban wanrah ka jingpynkylla ïa ka aiñ Foreign Contribution Regulation Ammendment Bills, 2026 kaba la wanrah ka jingkylli jong ki ri ka pyrthei bad khamtam eh napoh ka ri America.