Shillong, Naitung 04 : U Myntri Rangbah ka Jylla u Conrad K Sangma mynta ka sngi Ba-ar, ula ïakynduh ïa ki dkhot jong ka International Solar Alliance (ISA) ha Gurugram, New Delhi bad ïasyllok bad ïamir jingmut sani kumno ba ka Jylla kan shim ïa ki buit treikam kiba paka duh ha ka ban lah pynmih bording na ka bor jong ka Sngi.
U Myntri Rangbah ula sam paidbah ruh ïa ki dur ba ula shon bad ki dkhot ka ISA lyngba ki rynsan social media jong u.
“Ki buit treikam bala batai da ka ISA kan plie lynti ïa ngi ban shim ïa ki buit treikam kiba ïasyriem na ka bynta ban pyntrei kam ïa ka CM Solar Mission hapoh ka Jylla” ong u Myntri Rangbah hapoh ka twitter.
Kane ka jingïakren ka la wan ruh ha ka por ba ka Sorkar Jylla ka don jingthmu ban pyllait paidbah ïa ka jingtreikam jong ka Chief Minister’s Solar Mission ha une u bnai Naitung, kaba la mang ban pynlut haduh T. 100 klur.
Hashuwa kane, u Myntri Rangbah ula ïakynduh bad ïashong jingïalang ruh bad u Chairman bad Managing Director ka NTPC Gurdeep Singh.
Haba phai sha ka Solar Mission, u Myntri Rangbah ha ka sngi Nyngkong, ula pyntip ba ka Sorkar ka la dep pynkhreh lut ïa ki kot ki sla ba donkam. U pyntip ba ha kane ka project, kan don ka bynta ba ai subsidy ka Sorkar, ka jingairam bad kiwei kiwei.
Ula pynpaw ruh ba ka Sorkar Jylla kan pyrshang ha ka ban pynbun ïa ka subsidy.
Lah ban kdew hangne ba dang shen, ka Kynhun Myntri ka la ai jingmynjur ban pyntreikam ïa ka Chief Minister’s Solar Mission hapoh ka Jylla.
