Ha u Myntri ka Sorkar Pdeng pynsngew u Conrad ban buh ïa ki CUET Centre ha Meghalaya
Shillong, Naitung, 04: U Myntri Rangbah ka Jylla ha ka sngi Baar u la pynsngew hakhmat u Myntri ka Sorkar Pdeng u Dharmendra Pradhan ba un tuklar lem ha kaba ïadei bad ka jingshah ktah jong ki samla pule ka jylla Meghalaya bad ka jingdonkam ban buh noh ïa ki Common University Entrance Test (CUET) Centre ha ki 12 tylli i District ka Jylla Meghalaya.
U Myntri Rangbah u la kyrpad ruh ïa u Myntri ka Sorkar Pdeng ban phah ïa ka jingbthah sha ka Ministry of Education bad sha ka National Testing Agency (NTA) ban pynlong ïa ka eksamin kyrpang jong ka CUET na ka bynta ki samla pule ka jylla Meghalaya kiba la duhlad ban thoh ïa ka eksamin na ka daw ka jingïoh ïa ki jaka thoh eksamin CUET shabar jong ka Jylla.
“Ngi la kyrpad ïa ka Sorkar India ba kan buh noh ïa ki CUET Centre ha baroh 12 tylli ki district jong ka Meghalaya ha ki jaka pule kiba don ïa ki tiar kiba biang na ka bynta ban pynlong ïa ka eksamin CUET,” la ong u Sangma.
Ka Sorkar Meghalaya ka la ai jingmut ba ïa ki CUET Centre dei ban buh ha Shillong, Tura, Jowai, Nongstoiñ bad ha Williamnagar ba kin kynthup lang ïa kiwei kiwei ki District bamarjan.
Ha ka jingïakren, u la pynpaw ruh ïa ki jingeh kiba ju mih na ka por sha ka por ba la ïakynduh da ki Teacher Training Institutions kiba don ha ka Jylla ha kaba thep ïa ki kot ba donkam katkum ba la bthah da ka NCTE. U la ïathuh ïa ki jingeh kiba mih ha website jong ka NCTE kaba ju jia na ka por sha ka por.
U la pyntip ruh ba ka Sorkar India ka la leh jynsur mynsiem ban buh ïa ka NERIE ha Meghalaya kaba ïa mynta ka dang pdiang tang 50 ngut ki samla pule ban bteng ïa ka jingpule B.Ed na ka bynta ka thaiñ Shatei Lammihngi baroh kawei.
Hynrei, u la kdew ba ka jingïoh rung jong ki samla pule ka jylla Meghalaya ha NERIE ka dang duna shaba palat haba ïanujor bad kiwei pat ki samla pule kiba wan na kiwei jylla kiba nabar.
U Sangma u la kyrpad ruh ban kyntiew ïa ka jingpynrung ïa ki samla pule ha NERIE, Meghalaya khnang ba ki samla pule na kiwei pat ki jylla bad ha ka Meghalaya kin ïohlad ban pyndep ïa ki jingpule ha NERIE kaba long ka shlem pule kaba pawnam ha ka thaiñ.