SHILLONG, Nailur 08: Ki ar tylli ki jingïakhun ka lympung phutbol kyrdan Second Division 2024 jong ka Shillong Sports Association ba la long ha ka Sngi Saitjaiñ (07.09.2024), la sakhi ïa saw tylli ki kynhun kiba la ïasam mar shi point hadien ba ïakhaid ha ki jingïalehkai ha SSA Ground, Polo.
Haba phai sha ka jingïakhun kaba nyngkong, ka Sohiong SC ka la ïakhaid bad ka Umphrup SC da mar 2 kol ha ka jingïakhun kaba itynnat bha.
Watla ka Umphrup SC ka la ïoh ban lamkhmat lypa da 2 kol, hadien ki kol ba la thep da u Fredy Kharbyngngar (34minit) bad na u Bannangkiew Khriem ha ka (47 minit), hynrei ka jingïalehkai ka la kylla ha ki khyllipmat shuwa ban kut naba ka Sohiong SC ka la ïakhun tyngeh tad haduh ba kan da ïoh pynïakhaid.
Hadien ba u Batipskhem Wahlang u la ai mynsiem ïa ka kynhun da kaba pynkhih ïa ka kol ha ka 86 minit, u Wamboklong Kharshileit u la lah ban pynbud sa ïa ka kol kaba ar (90+2 min) ha ka khyllipmat shuwa ban kut, kaba la pynlong ïa kine ki ar kynhun ban ïasam mar shi point.
Haba phai sha ka jingïalehkai kaba ar, ka Laitkyrkhong SC bad ka MLP FT ki la ïakhaid noh da mar shi kol (1-1 kol). Ha ka jingïakhun, dei ka Laitkyrhong SC kaba la pynkhihjar nyngkong lyngba u Learningstar Warlarpih (20 min) katba u Aldrin Monlang Ramsiej u la pynïakhaid noh na bynta ka MLP FT ha ka minit ba 33.
