Nongstoiñ, Jymmang 14: Ka jingshna ïa kawei pat ka karkhana saiñ nar harud jong ka wah rwiang ka la ïaid shait shait ha kine ki sngi. Ha kaba ïadei bad katei ka karkhana saiñ nar ba thymmai harud ka wah Rwiang la pyrshang ban kren bad u sordar jong ka shnong Mawbyrngem hynrei utei u sordar um shym kwah kren ei ei. Tangba katei ka karkhana saiñ nar ka dei kaba la da ai jingbit da u syiem ka hima Nongstoiñ.
“Hadien ba la dep pynbiang lut bad la sdang ban pyntrei katei ka karkhana ka hap ban pyndonkam da u rnga, mawleiñ bad u dewïong bad ka lah ban pynjaboh ïa ka wah Rwiang saw shah ban ïa kaba ka long mynta. Kumba ka long mynta wat tang na ka jingtreikam jong kawei ka karkhana saiñ nar kaba la don lypa ka Shakambari Ferro Alloys Limited, ka la don ka jingktah kaba jur bha ïa ka mariang ym tang ïa ka lyer, hynrei ïa ki doh um doh wah kiba im ha ka wah Rwiang bad kiwei kiwei ki wah ha ka thaiñ”, ïathuh u bah Dominik Lyngkhoi ha u nongthoh khubor.
U la ong ruh, “Haba phai sha ki saw dong saw kun la lap ruh ba ka jingdon jong katei ka Shakambari Ferro Alloys Limited ha Rwiang, ka la ktah haduh katta katta ïa ki khlaw ki btap na ka jingthang rnga ban shalan sha katei ka karkhana. Kumta lada ki paitbah ka thaiñ kim sngewthuh, kin mad ïa ka jingeh kaba khraw hadien ha bud ha ki khun ki ksiew pateng”.
