Nongstoiñ, Jymmang 14: Ka jingshah siat ïap jong ki saw ngut ki rangbah Khasi ha ki pulit Assam ha Langpih ha ka 14 tarik Jymmang 2010, ka la kynjoh khat lai snem thik mynta ka sngi u Blei. Hynrei na ka daw jong ka jingïatyngkhuh bad ka sngi u Blei, ki riew rangbah ka thaiñ ki hap ban leh burom noh ha ka sngi saitjaiñ, da kaba leit buh syntiew ha u mot sah jingkynmaw ba la tei da ka hima Raidmynsaw hakhmat ka ïew Langpih.
Ha katei ka sngi ki rangbah ka thaiñ kim shym la khot satia ïa ki paitbah, hynrei ki la ïamih tang khyndiat ngut ki longkmie ryngkat ki rangbah na ki shnong kiba marjan kum na Langpih, Iewnongma, Umtap, Madanjaïaw, Mawsikar, Umyiap bad kiwei kiwei ki shnong ba marjan. Ha kane ka sngi la donlang ruh u bah K.P.Pangñiang u ba dei ruh u nongai buit jong ka Raidmynsaw naduh ki snem ba mynshuwa.
Shuwa ban buh ïa ki syntiew, u bah Hindro Samakha sirdar barim jong ka Raidmynsaw, u la pynkynmaw ïa ki jingeh ba ki paitbah katei ka thaiñ ki ïakynduh, naduh ki por ba ki dang sdang ban ïaksaid ha ka jingïaleh ban lait na ka jingshah thombor ha ki pulit Assam, haduh ba ka la poi haduh u pud ba ki pulit Assam ki la siat pathar ïa ki paitbah Khasi, ha ka por shiteng sngi bad ba ka dei ruh artad ka sngi ïew kaba ki paitbah ki dang bun kam ha ka thied ka pet.
U la pynkynmaw ruh ba ka jingshah siat ïap jong kitei ki saw ngut ka la long ka jingduh kaba khraw ïa ki ïing ki sem jong ki khmtam eh ïa ki khun ki kti.Nalor kata u la ong ruh ba ka jing shah siat ïap jong kitei ki saw ngut ka dei ka history ka ban sah kynmaw pateng la pateng ha ki paitbah ka thaiñ bad kaba kum katei ka jingjia kam dei ban jia shuh nangne sha khmat.
Ha katei ka sngi la ïoh ruh ïa ka jingkren na u bah K.P.Pangñiang ha kaba u la ong ba ki saw ngut kiba shah siat, ki la long kum ki langkñia bad ka Raidmynsaw ka nud ban tei ïa u mot sah jingkynmaw ïa ki saw ngut, ka dei halor ka nongrim ba katkum ka kaiphod ba la ïoh na u Nongbishar jong ka Ïingbishar Phukan Commission na Guwahati, ka pyni shai kdar ba kitei ki saw ngut ki la ïap na ka jingshah siat ha ki pulit.
U la ong ruh ba ka jingleh burom jong ki ha katei ka sngi kam dei ba ki don kano kano ka mynsiem ban pynkhih pyrthei biang. Hynrei ka long kum ka dak jong ka jingkynmaw burom bad pynsah nam ïa ki kum ki riewshlur jong ka thaiñ bad jong ka jaitbynriew hi baroh kawei. U bah Pangñiang u la ong ruh ba ka Langpih sector ka dei ka jaka jwat bha ban ïa pynbeit. Watla katta ruh kumba ka sorkar ka la ju ïatai hapoh ka Ïingdorbar Thawaiñ, u kyrmen ba ha kane ka wat kaba ar jong ka jingïapynbeit pud ka sorkar kan shim ïa ka rai kaba pynhun ïa ki paitbah, khnang ba kan lait na ki jinghuri hura.
