Nongstoiñ, Jymmang 14: Ka seng ki samla kaba la tip kum ka Nongstoiñ Youth Calesthenic kawei na ki seng kaba ïalehkai ïa ki jingkilan met, ha ka sngi saitjaiñ ka la pynlong pynlong ïa ka lympung kaba la tip kum ka “Street Workout” Calesthenic Battle Meet Up Contest”.
Ïa katei ka jingïalehkai la ïoh ban pynlong ha rud wah Nondeiñ bad la ïohi ruh wat haba ka dei tang ka lympung kaba rit, pynban ki samla jong ka thaiñ na ki shnong bapher bapher ki la wan ban ïashimbynta shitrhem. Nangta u samla Rehearsal Jones Hynñiewta u ba na Mawlai sor Shillong, u ba dei uwei na ki nongseng nyngkong ïa kum katei ka jingïalehkai ha ka jylla, u ba ju leit ruh ban ïashim bynta ha ki kyrdan National Level bad ka World cup, u la wan ban sakhi lang ïa katei ka lympung.
Ha katei ka sngi ïa ka nam lahduh la ïoh ban khur da u samla Dapborlang Lyngkhoi, ba ar Biangborlang Marthong, ba lai Rickyson Khardum, Best combo athlete Dapborlang Lyngkhoi, Nongïalehkai ba dang Khynnah tam la ïoh da u Robert Lyngdoh Marshillong bad u ba don akor tam la ïoh da u Maitshaphrang Wahlang
Lah ban pynkynmaw ba kum shi bynta ban khring ïa ki samla ba kin lait na ki jingmlien ba sniew, ki khun samla jong ka shnong New Nongstoiñ, ki la mih madan ban seng ïa ki kam jingïalehkai kilan met kaba la tip kum ka Nongstoiñ Youth Calesthenic.
La sdang ïalehkai ïa katei ka jinglehkai naduh u snem 2020 ha ka por ba wan lyngshop ka khlam Corona, da ka jingïalam jong u samla Aiborlang Marshillong kum u president jong katei ka bad u samla Banskhemlang Syiemlieh kum u secretary.
Kitei ki khynnah samla ki la pynpaw ruh ïa ka jingkyrpad ïa kino kino kiba lah ban noh synñiang lem ïa katei ka seng jong ki, namar ha katei ka jaka la ong ba lada wan u slap ka ju dap um bad kim lah shuh ban ïoh ïalehkai ha katei ka jaka. Ki ong ruh ba ki don ka jingkyrmen ba ha kawei ka sngi katei ka jingïalehkai ruh kan long lang kum kiwei kiwei pat ki lympung.
