Nongstoiñ, Jymmang 14: Ha ka sngi saitjaiñ ka kur Mawsor ka la ïoh ban pynlong ïa ka Dorbar jong ka kur kum shi bynta ban pyllait paidbah ïa ka kot ‘Riti Treikam’ jong ka jaid Mawsor.
Ïa katei ka kot riti treikam jong ka kur la ïoh ban pyllait paidbah da u bah J.War MDC bad E.E KHADC u ba la long ruh kum u kongsan ha katei ka jingïalang ba la pynlong ha ka shnong Mawkhlam Nongpyndeng.
Katei ka jingpyllait paidbah ïa katei ka kot wat lada ka dei ka sien kaba nyngkong ruh, hynrei ka dei pat ka kot kaba la thoh da ki longshuwa jong ka kur Mawsor. Mynta ki longdien ki la shu pynjanai ïa kaei kaba la dep ban thoh da ki mynnor ïa ka kot ‘Riti Treikam’ jong ka jaid Mawsor kaba naduh ki snem 1966. La pynwandur biang khyndiat kynsoit ïa ki katto katne ki bym ïahap shuh katkum kane ka juk kaba mynta namar ka jingkylla jong ka Ïa.
Ha katei ka sngi la ïadonlang u bah H.Witting Mawsor, Dr L.L.Mawsor, bad la pynïaid ïa katei ka jingïalang da u bah P.Mawsor u ba dei u Rangbah Kur ka jaid Mawsor baroh kawei.
