Nongstoiñ, Jymmang 14: Kum shi bynta ban ai mynsiem bad kitbok kit rwiang, ka Kur Paliar ha ryngkat ki Sengbhalang ka thaiñ Nongstoiñ, ha ka sngi saitjaiñ ki la pynkup burom ïa u Hubert Palair u nongïakhun kti (Arm Wrestler) u ba la ïoh khur takma ksiar bad rupa ha ka lympung kaba dang shu dep ha Dubai. Ïa katei ka jingïalang pynkup burom la pynlong ha ka ïing dorbar jong ka shnong Mawkadiang, ha kaba la ïadon ryngkat lang ruh kiba ha ïing ha sem bad ki kur ki kha u bah Hubert, ki nongïalam ka shnong Mawkadiang ki sengbhalang bad kiwei kiwei.
Lah ban kdew ba ha ka jingïakhun ha ka lympung 20th Asian Para Arms Wrestling Championship kaba la long ha Dubai, u bah Hubert u la ïoh khur ïa ka takma ksiar ha ka jingkhia kaba 70 kg da ka kti ka mon (Right Hand) bad ïoh takma rupa ruh ha ka jingïakhun da ka kti ka diang (Left Hand).
Lyngba katei ka jingjop ha Dubai u bah Hubert u la wanrah nam ym tang ïa ka kur ka jait bad ïa ka dong ka thaiñ. Hynrei u la wanrah nam ruh ïa ka Jylla bad ïa ka Ri hi baroh kawei bad ha kine ki khyndiat sngi un sa mih noh na Shillong bam leit ïashimbynta biang sa ha ka lympung ka ban sa long ha Kashmir.
