Nongpoh, K’Lyngkot, 28: Wat hadien bala paw tyngkreiñ bad buh hakhmat ka jingkieng ïaka signboard bala mana ïaki trok kit palat pud ba kin ïaid lyngba ka jingkieng Lailad, kaba la don kumba 38 snem mynta ba tang ki kali ba hapoh 9 ton ki lah ban ïaid lyngba katei ka jingkieng namar ka jingma kaba lah ban ap ïaki paidbah, hynrei haduh mynta kiba bun naki trok kit palat pud kim shym la kheiñ snep ïaka hukum bad pynkheiñ aiñ ban ïaid lyngba katei ka jingkieng.
Kum ban shu pynpaw ba katei ka jingkieng kaba don ha Lailad ban kam ïaka wah Umtrew ka dei kawei naki jingkieng kaba la rim tam bad kaba ym lah ban tip ba ka jingma ka lah ban ap ha kano kano ka por ban ïaid lyngba u surok Umling-Patharkhmah bad wat naki nongïalam shnong kila ju dawa naka por shaka por ban shna noh da ka jingkieng thymmai namar ka jingma kaba ap bad kaba lah ban wanrah ka jingjia ba sngewsih ha kano kano ka por.
Lah ruh ban pynkynmaw ba dang ha ki khyndiat snem bala leit naka liang ki engineer ka tnad PWD bad u MLA ka Jirang u Bah Sosthenes Sohtun kila leit ruh ban pynlong ka jingjurip ïa katei ka jingkieng naka bynta ka jingpynkhreh pynkhrum ban pynmang pisa ban shna da ka jingkieng ba thymmai.
Hynrei kumba long mynta la sakhi ba bun na ki trok kit palat pud ki dang pyrshang ban ïaid bad pynkheiñ aiñ lyngba u surok Umling-Patharkhmah khamtam haka por mynmiet ban shim kabu ruh naka jingbha u surok naduh bala dep ban siang rong khlem da kheiñ ïaka jingma jong ka jingkieng Lailad bad kaba lah ruh ban pynduh tang katno ïa u surok ba dang shu dep siang rong thymmai.
