Mar ïa sdang snem 15 klur buh mawnongrim u Bah Sanbor ban shna 10 tylli tylli ki surok

Shillong, K’Lyngkot 28 : U MLA ka Shillong South Bah Sanbor Shullai ha ka sngi Saitjaiñ u la buh ïa ki mawnongrim na ka bynta ban tei haduh 10 tylli ki surok kiban tei ha ka jinglut kaba kot sha ka 15.21 klur tyngka ha kylleng ki bynta jong ka constituency.
Ïa kine ki mawnongrim u Bah Sanbor u la plie paidbah ha ka jingïalang kaba long ha Assam Club ha ryngkat ka jingdon ki nongïalam shnong ki trai jaka bad kiwei kiwei.
Haba kren ha kane ka sngi, u Bah Sanbor u la ong ba ki paidbah ka constituency ki dei ban long ki nuksa sha kiwei pat ki paidbah ka Jylla ha ka jingpyntrei ïa ki kam pynroi ha kaba ki trai jaka khlem bynnud ki ai ïa ki jaka ban pyntrei ïa ki projek kam pynroi na ka bynta ka pateng ban sa wan.
“Nga ai khublei shibun eh ïa ki trai kaka, kiba la rai ban ai jaka ïa kine ki 10 tylli ki projek, naba khlem ka jingïatreilang bad jingkyrshan jong ki, kam long kaba suk ïa ka tnad PWD ban mang pisa ïa kine ki project” ula ong.
U Bah Sanbor u pyntip ruh ba ka constituency kala ïoh ruh ïa ka song pisa ba T 12.5 klur na ka DoNER Ministry ban shna ïa ka Iew Municipal ha kaba ka kam kala ïaid shaid shaid nalor kiwei pat ki kam pynroi hapoh ka Constituency.
Ki surok kiba buh mawnongrim ha kane ka sngi ki kynthup ïa ka jingpynheh ïa ka surok bad siang rong ïa ka surok ba rim ter ter shaduh Rilbong community Hall bad shaduh surok Jingkieng Umshyrpi, Rilbong ha ka jingmang pisa ba 4.35 klur tyngka.
Nangta ka jingshna ïa ka surok ba pynïasoh na lad surok PWD ter ter sha surok Mynsaiñ ha phang kadiang haduh ka ïing jong u Dev Das Chakraborty ha Lower Lumparing, Shillong. Ka jingmang pisa na bynta kane ka surok ka long 1.38 klur tyngka.
Nangta ka jingshna ïa ka nala um ne ka Aqueduct Drainage System lyngba ka surok PWD na markhap ka Glory mai (Laban) ter ter haduh St. John School/Church Madan Laban ha ka jingmang pisa ba 55 lak tyngka. Ka jingshna ïa ka surok iaid kali halor ka nala bad kshaid jong I kong (L) Q. Kharwanlang sha ka jingkieng PWD ha Lower Lumparing ha ka mang pisa ba 1.14 klur tyngka.
Kawei pat ka projek kadei ka jingshna ïa ka surok na PWD road lyngba ka Iingsah I Dr Merybell Marbaniang haduh ka Iingsah u Bah Rolet Rynjah bad kiwei ha Madan Laban, Shillong ha ka jingmang pisa kaba 1.77 klur tyngka. Nangta ka jingpynheh ïa ka suroh PWD na Top Um marjan ka Iingsah u Bah Thelesar Syiemlieh bad Kong Shortina Rynjah ha Block-A, Kynjat Phutbol, Shillong ha ka jingmang pisa kaba 63 lak tyngka.
Ka jingshna ïa ka Aqueduct Channel ha surok Kench’s Trace na Bishnupur Taxi Stand sha Bathesda Hospital Upper Kench’s Trace kaba la mang 2.41 klur tyngka, ka jingshna ïa ka surok na Main Entrance Gate ka Art & Culture ha Rilbong sha ka surok na Rilbong Community Hall sha Umshyrpi PWD Road Rilbong ha ka jingmang pisa kaba 1.98 klur tyngka bad ka jingshna ïa ka surok dewbilat na Ch:870.00 Keating Road sha phyllaw Lady Keane kynthup ka RCC Railing ha HP culvert ha ka jingmang pisa ba 14.18 lak tyngka.
La mang ruh 82.81 lak tyngka ban shna ïa ka surok ïaid kali sha Lumjingthang (Cremation Ground) jong ka Seng Khasi Ri- Raid Laban ha Lumparing, Breast Wall ha Sanbor Shullai Road (Ch.220.00-270.00m), Hollow Block Fencing Wall ha Shri Sanbor Shullai Road,, Outlet Drain bad ka slab na Lum jingtep Muslim shajan ka iingsah I kong Aitimon Myrthong bad ban siang rong biang ïa ka surok Lumparing, Shillong.