Shillong, K’Lyngkot 28 : Ka kyrtong MP jong ka National People’s Party (NPP), Dr. M Ampareen Lyngdoh dang shen ka la ong ba ka NPP kam ju khot da ki jingïalang kiba heh ba heh ban die ïa ki form pynrung party kiba rem na bynta kito kiba kwah ban pynïasoh ne kyrshan ïa ka party.
Ïa kane katei ka longkmie kaba dei ruh ka Myntri ka tnad na Koit ka Khiah ka jylla ka la kren ha ka jingialang pdiang burom ïa u MDC ka Congress na Mairang sha ka party, Bah Batskhem Ryntathiang ha ka jingïalang ka long ha Mairang hi.
“Ka NPP kam ju khot da ki jingïalang ba heh ban die form pynrung party kiba rem ba rem hynrei kadei ka party trei mon sngewbha, kaba ki paidbah ki wan da ka mon sngewbha ban kit lang ïa ki jingkit ba khia kiba ap na ka bynta ka ri bad ka jaidbynriew,” ong ka kyrtong haba kren ha katei ka jingïalang.
Ha kajuh ka por ka la ong ruh ba kum ka party ki ïeng ha ka nongrim ban ym pharia ïa ki nongshong shnong ha ka jinglong jingman jong ka Jaidbynriew. “Ka jingïoh jongngi ïa ka jylla ba pura ha kito ki por kadei da ka jingwan lang jong ki nongïalam na ki Jaidbynriew bapher bapher da ka mon sngewbha ban dawa la ka jong ka jylla lyngba ka Hills State Movement,” ka la bynrap biang.
Shuh shuh ka la ong ruh ba ha kito ki por ym ju don nongïalam kiba kwah ban wanrah ka jingïapher ne pharia hapdeng ki laitylli ki Jaidbynriew ba don ha ka jylla kata hapdeng ki Khasi, Jaintia lane Garo.
“Ngi kiba ïalam mynta ïa ka saiñpyrthei ngin ym shah da lei lei ruh ïa kane ka jingpharia. Kumta wat pharia ïalade ha kum kane ka juk politik kaba ki nongwan na ka sorkar kmie ki thapkti haba mangi ngi ïapait ïa pra ”
Ha kajuh ka por ka ong ruh ba ki paidbah ki dei ban sngewthuh ba ka NPP kam dei ka party nongwei kumba don kiba pynsngewthuh bakla hynrei kadei kaba la pynlong doh pynlong snam da ki nongshong shnong ka Meghalaya.
“Ïa kito kiba kdew kti ba dei ka party nongwei sngap bad pynshongnïa ïa ki jingkynnoh jongphi,” ka la bynrap biang.
Lah ban kdew hangne ba ka NPP ka la sei baroh arngut da ki longkmie ban aireng ha kane ka elekshon MP, kata na Shillong da ka Dr. Ampareen Lyngdoh bad na Tura seat da ka MP ba mynta hi, ka Agatha Sangma.
