Nongpoh, Naitung 19: Ka Special Intensive Revision (SIR) jong ka Electoral Roll ka dang ïaid beit ïaid ryntih ha Ri-Bhoi District hapoh ka jingïalam jong u District Election Officer (DEO), Ri-Bhoi District, ha kaba ka tnad elekshon ka dang pynjur ïa ki sienjam ban pynthikna ba baroh ki nongthep vote kiba dei hok kin ïashim bynta ha ka jingpynbeit thymmai ïa ka thup kyrteng ki nongthep vote.
Katkum ka jingïoh lum jingtip, haduh ka 18 tarik Naitung 2026, la dep ban sam haduh 2,04,286 tylli ki Enumeration Forms (EFs) ha ka district baroh kawei, kaba long 99.6% na baroh ki nongthep vote kiba dei hok. Ha kajuh ka por, 99,852 tylli ki Enumeration Forms la dep ban digitise, kaba long 48.5%.
Ka jingïaid shaphrang jong ka jingsam ïaki Enumeration Forms ha ki constituency bapher bapher ha Ri-Bhoi District ki kynthup ïaka 8-Mawhati AC kaba la poi haduh 99.8%, 9-Nongpoh AC- 99.7%, 10-Jirang AC- 99.6%, 11-Umsning AC- 99.4%, 12-Umroi AC- 99.2% bad kumba long ha Ri-Bhoi District ka SIR kala ïaid beit man ka sngi da ka jingshim bynta shitrhem jong ki paidbah nongshong shnong kiba dei hok ban rung haka thup kyrteng ki nongthep vote.
Naka liang u District Election Officer, u la kyrpad ïa baroh ki nongthep vote kiba dei hok ba kin dang ïai bteng ban ïatreilang bad ki Booth Level Officers (BLOs) bad ban pyndep bad aiti noh ïa ki Enumeration Forms hapoh ka por ba la buh, khnang ba ka thup kyrteng ki nongthep vote kan long kaba thikna bad kaba biang.
U la ong ruh ba ka ophis ka dang thmu ban pyndep 100% ka jingsam bad ka digitisation jong ki Enumeration Forms shuwa ban kut ka por ba la buh na ka bynta ka Special Intensive Revision.
Ki paidbah kiba donkam jingïarap ne kiba kwah jingïashai shaphang ka Special Intensive Revision (SIR) ki lah ban phone sha ka SIR Help Desk ha u nombar 9863985792.
