Ïaid baheh ki trok kit dewïong, rnga, shyiap na ka surok Patharkhmah- 20 Mer

Nongpoh, Jymmang 14: Ki nongïalam Shnong na ki 7 tylli ki shnong ba hap hapoh ka Raid Sohkhwai ha Ri Bhoi District mynta ka sngi ki la lum kyrkieh da ka jingïakynduh lang na ka bynta ban ïa kren bad ban ïa thir bad pyrshah jur halor ka jingwan ki trok kit khia bad ïaid lyngba na katei ka surok shnong na Umdu ban mih sha 20mer Pahammawleiñ, kaba la pynsniew ïa ka surok bad buh jingma ruh ïa ki paidbah nongleit nongwan na ka daw ka jingrit jong ka surok.
Haba kren sha ki lad pathai khubor, u President ka Synjuk ki rangbah Shnong Raid Sohkhwai, u Bah Bristar Sylliang, u Bah Shanbor Rani, Secretary ka Synjuk bad ruh u Bah Aibankitbok Sylliang, Secretary ka Seng Samla Sohkhwai, ki la pynpaw ba ki sngewkhia halor ka jingwan ïaid sahuh ki trok ba kit khia na katei ka surok kaba la buh jingma ïa ki paidbah, kaba dei na ka daw ka jingrit ka surok ba la shna lyngba ka scheme PMGSY kaba dei ban ïaid tang ki kali paidbah bad ym ki kali heh ne ki kali ba kit khia khamtam ki trok.
Ki la ong ruh ha ka jingshisha kane ka surok kam dei ka surok ban ïaid kita ki kali heh, hynrei ki trok ki shim kabu ban kiar ruh ïaka khyrdop khrong khajna (Weighbridge) ka sorkar ha Umling, hynrei ki la ïaid na kane ka surok ka long tang ban lait ban siew khajna ïa ka sorkar bad kim sngewthuh pat ïa ka jingshah ktah ki paidbah ba ki ïaid lyngba kane ka surok ba la mang ban ïaid tang ïa ki paidbah nongshnong ne ki kali rit.
Ki la ïathuh ruh ki trok ba kit khia ba ïaid lyngba kane ka surok ki kynthup ïa ki trok ba kit dewïong, rnga, shyiap, maw bad kiwei kiwei. Kitei ki 7 tylli ki shnong kiba la rai ban pyrshah halor kane ka jingwan kitei ki trok kit khia ki kynthup ïa ka shnong Sohkhwai, Nongtyrlaw, Umdu, Kpep Syiem, Umladoh, Umsohma bad ka shnong Umden La-ang, kiba dei ki shnong kiba hap hapoh ka Raid Sohkhwai.
Ki la byrthen tyngeh ruh, ba nangne shakhmat ki trok ba kit khia kim dei shuh ban ïaid lyngba kane ka surok bad lada dang don kiba ïaleh pyrshah kin bat bad kin aiti beit sha ki bor ka ain ban leh ïa kaba donkam katkum ki kyndon aiñ.
Shuh shuh, ki la ong ruh lyngba ka Synjuk ki Rangbah Shnong Raid Sohkhwai bad ki Seng Samla ki la rai ruh ban ujor noh da ka shithi sha u Deputy Commissioner ka Ri Bhoi ba un shim khia mardor halor kane ka kam ïaid beaiñ kitei ki trok bad kum ka synjuk bad ki samla ruh kin dang peitngor ba lada ki dang lap nangne shakhmat kin leh beit da kaba tyngeh, ki la bynrap.