Shillong, Jymmang 14 : Ka kynhun ki nongrep na kylleng ki distrik jong ka jylla la ka long naduh Khasi – Jaintia haduh rilum Garo ki la kynduh lang khrui ha ka sngi Balang ha ophis treikam jong u Symbud Myntri Rangbah ka Jylla, Bah Prestone Tynsong ban ïa kren halor kiba bun ki ishu kiba ktah bha ïa ki nongrep.
Kane ka kynhun hapoh ka lama jong ka NPP Farmers Front hapoh ka jingïalam jong u Bah HM Shangpliang ka la ïoh ban pynsngew ha u Symbud Myntri Rangbah ïa ka jingeh kaba ki nongrep na kylleng ki distrik ki kynduh khamtam eh haba ïadei bad u synsar hadien ba ka sorkar ka la pyntreikam ïa ka skim CM Assure.
“Ngi la kyrpad ïa ka sorkar ban kyntiew ïa ka dor u synsar namar u grade-1 ka dor ka long 55 tyngka shi kilo. Nalorkata bun ki nongrep ki don ïa u synsar palat ïa ka 800 kilo ba buh ka sorkar kumta ki kyntu ïa ka sorkar ba kan kyntiew shuh kham ka jingshim ïa u synsar la ka long 1000 kilo ne 1500 kilo katkum ka jinglah ka sorkar na bynta ka jingmyntoi ki mar rep,” ong u Bah HM Shangpliang haba kren bad ki lad pathai khubor.
UBah HM Shangpliang u la ïathuh ba kum ka kynhun ki la ïoh ruh ban pynsngew ïa ka jingud ki nongrep halor ka jingjur palat ka jingbam khñiang ki dieng kwai kaba la sdang ban pur mynta jan baroh ki distrik jong ka jylla. Kumta ha ka jingïakynduh ki la kyntu ïa u Symbud Myntri Rangbah ban phah da ki scientist ban wad bniah ïa ka daw bad ruh ban wad ka lad ka lynti kumno ban ïakhun ïa kane ka jingïap tram nalor ban ai ïa ka bai luksan sha ki nongrep.
Ha kawei pat liang u la ong ba ki ïoh ruh ban pynpaw ka jingsngewnguh ba lyngba ka jingtuklar jong u Symbud Myntri Rangbah mynta ki la lah ban sam ïa ki dawai sboh sha ki nongrep
Kawei pat ka mat kaba ka kynhun ka pynsngew ka long halor ka jingud ki nongri jingri ba kim ju ïoh shuh ïa ki khun sniang bad khun syiar na ka tnad Veterinary jong ka sorkar jylla kumba ki ju ïoh ha ki por ba mynshwa. La ïathuh ruh ba ka kynhun ka la ïoh ruh ban pyntip ha u Symbud Myntri Rangbah halor ka jingud ki nongrep ba kim ju ïoh shuh wat ïa ki symbai mar rep na ka tnad ka rep ka riang jong ka sorkar jylla.
Na ka kynhun ki la pynsngew ruh halor ka jingeh ba ki nongri jingri ki kynduh namar ka jingbym don ki doktor ba sumar ïa ki jingri bad kumjuh ki dawai ïa ki jingri ha ki veterinary bapher bapher ba don ha ka jylla.
Haba jubab halor ka jingkylli, u Bah HM Shangpliang u la ïathuh ba na ka liang u Symbu Myntri Rangbah u la shahshkor ïa ka jingpynsngew jong ki ryngkat ka jingkular ba un sa shong bishar bniah ïa kine ki jingdawa kiba ka kynhun ka pynsngew bad ong shen un sa lum ïa ki tnad ba dei peit ban tuklar halor kane.
