Mawkyrwat, Jymmang 14 : Ka Federation of Khasi Jaiñtia & Garo People’s (FKJGP) jong ka South West Khasi Hills District mynta ka sngi ka 14 tarik u Jymmang, 2025 ka la ïoh ban leit plie paidbah biang ïa ka jaka ai jingsumar ne Health Sub Centre kaba don ha shnong Umjaraiñ, South West Khasi Hills District.
Lah ban kdew ba kane ka jingleit ban plie noh jong ka FKJGP, South West Khasi Hills District ïa ka tala ba la khang shipor ïa katei ka jaka sumar ka long ba na ka liang ka ophis jong u District Medical & Health Officer (DM&HO), South West Khasi Hills District ryngkat ka tnad ka koit ka khiah na ka Director Health Services Shillong ha kaba kim shym la thung kam pura ha ka Permanent Post ïa ka kong Shidalin Lyngkoi hynrei la shu thung ïa ka tang kum ka ka noh leit bujli ne Officiate ban trei ha ka Health Sub Centre.
Kumta, ka FKJGP ryngkat ka jingsynran lang u Secretary Shnong Umjaraiñ lem bad u President ka Seng Samla Shnong Diwah Area ki la leit ban khang-tala ha ka 10 tarik u Jymmang, 2025
Hynrei kaba pynkmen ïa ka kong Shidalin Lyngkoi bad ïa ka FKJGP ka long ba mynta ka sngi jong ka 14 tarik Jymmang, 2025 ka ophis jong u District Medical & Health Officer (DM&HO), South West Khasi Hills District ha ka jingïadon lang u Joint Director Health Services, Shillong, ki la khot ban ïa kren ïa ka seng bad kum juh ruh ïa ki trai ka jaka ha kaba ki la ïoh ban ïa kren sngewthuh halor ki kam baroh bad ha kane ka jingïakren na ka liang jong ka ophis DM&HO South West Khasi Hills District ka la kular ban ynsa thung pura noh ïa ka ka kong Shidalin Lyngkoi ym shuh tang kum ka nongwan bujli hynrei ha ka kam shi junom ne Permanent Post kumba la kular naduh nyngkong.
Ka kong Shidalin Lyngkoi kaba dei ka trai jaka bad kumjuh ka Federation of Khasi Jaiñtia & Garo People’s (FKJGP) jong ka South West Khasi Hills District ka la sngewhun ïa ka jingïakren mynta ka sngi bad ka la pynbna paidbah ba la shah ban plie biang ïa ka Sub Centre ha katei ka shnong na ka bynta ka jingdonkam jong u paidbah.
