Shillong, Nohprah 22: Ka Shillong Lajong kan sa ïakhun ïa ka jingïalehkai ba khadduh hala ïing na bynta u snem 2023 pyrshah ïa ka Namdhari FC mynta ka Sngi (23 tarik Nohprah) bad ka por kan long 2 baje nohphai Sngi ha SSA Stadium , Polo-Shillong .
Hadien ba ka kynhun ka la mad namrem ar sien lynter dang shen ha ki jingïakhun ba ladep, ka Lajong ka la ïoh khur saw sien namjop, ïakhaid saw sien bad rem ar sien bad ïa mynta ka kynhun ka shong ha ka kyrdan ba 6 ha ka miej da 16 point na ki 10 sien ïakhun.
Ha ka jingïalang shuwa ban jam sha ka sngi ïakhun, na ka liang jong u coach ka Lajong, Bah Bobby L Nongbet u la pynpaw ba na ka liang jong ka kynhun ka khmihlynti ban wanrah ïa ka jingïalehkai kaba itynnat na bynta lashai pyrshah ïa ka Namdhari ka kynhun kaba dang don jingkyrmen hadine ba jop ïa ka TRAU ha ka jingïalehkai ba ladep.
Katba na ka liang jong ka Namdhari ka shong ha ka kyrdan ba 11 ha ka miej da 8 point na ki 10 sien ïakhun. U Head coach jong kane ka kynhun, u Harpreet Singh u la pynpaw ba ka kynhun ka jong u ka don ha ka jingpynkhreh kaba biang na bynta ban jam sha ka jingïalehkai ka ban long mynta ka sngi bad ki player ki dang ïoh mynsiem hadien ka namjop kaba dang shen.
Kane ka jingïakhun ka long kaba kongsan na bynta baroh ar kynhun ban ïoh khur ïa ki lai point ban kyntiew ïalade kham shalor ha ka miej. Na bynta kane ka jingïalehkai, ki Ticket lah ban ïoh lyngba ka lectronic Centre, Police Bazaar, Cafe Shillong, Laitumkhrah bad na SSA Stadium Ticket Counter.
