Nongpoh, Nohprah 22: Kum ka khubor ba bha ban pdiang ïa ka jingwan ka Christmas ba ngi ngeit ba ka dei ka jingwan longbriew u khun jong u Blei, ka Jingïaseng Samla Presbyterian Patharkhmah mynta u snem ka la pynlong da ka jingïakop pynriam Christmas ha ki dong bapher bapher kum ka jinglehkmen ba kane ka Christmas kan long ka Christmas ba ka jingsuk bad ka jingkmen kan rung ha man la ki longïing longsem jong ka Shnong Patharkhmah.
Ki samla jong ki dong bapher bapher hapoh ka shnong Patharkhmah ki la shim bynta ban pynriam pynbeit Christmad da ki rong ki rup bad ki bor jingshai (Lighting), ha kaba kano kano ka kynhun ki samla kiba jop ha kane ka jingïapynriam Christmas kin ioh pdiang ïa ki Khusnam ha ka sngi Christmas.
Ka dei ruh ka sien kaba nyngkong ba ka Jingïaseng Samla Presbyterian Patharkhmah ka la pynlong ïa ka jingïakop pynriam Christmas kaba long shi bynta ban wan rah ïa ka jingïatylli hapdeng ki para samla hapoh ka Balang. Haba phah ïa ka khubor Christmas bad snem thymmai, u Secretary ka JIngïaseng Samla Presbyterian Patharkhmah, u Samla Sainikson Sankli, u la ong ba kum ka Jingïaseng samla ki angnud ba kane ka jingrakhe ïa ka Christmas bad snem thymmai ka dei ban don ka jingmut kaba jylliew ha ka jingim jongngi kum ki khun Kristan bad ka khubor kaba kum ki samla ki angnud ban phah sha kiwei ka long ba ngi dei ban long kita ki nongwan rah jingsuk jingkmen bad ki jingkylla ym tang ha ka Balang bad wat ha ka imlang ka sahlang.
Namarkata, na ka liang ka Jingïaseng samla ka phah ruh ïa ka khubor ba bha jong ka Christmas bad snem thymmai ba kum ki khun ki jong u Blei, ngi dei ban don kata ka mynsiem ba wan rah ïa ka jingïatylli ha ka imlang ka sahlang bad ban don kata ka mynsiem ban shakri ym tang ïa ka kam ka jong u Blei bad na ka bynta ka bha ka miat jong ka imlang ka sahlang namar ka jingkylla ka wan dei tang haba ngi don kata ka mynseim jong ka jingïaieit bad ka jingïatylli ha baroh ki liang, u la bynrap.
