Jowai, Nohprah 22: Ka Krismas ka dei ka aiom kaba kyrpang ïa ki Kristan ha kaba ki kynmaw ïa ka jingwan longbriew u Jisu Krist sha kane ka pyrthei. Kum ka dak ka jinglekmen ha kum kane ka aiom, sa shisien pat ka Jaiñtia Hills Development Society (JHDS) ryngkat ka jingïatreilang bad ka KHUBLEI Germany kala pynlong ïa ka prokram lehkmen Krismas bad ki khynnah kiba wan na ka longïing baduk.
Ïa kane ka prokram la pynlong ha ka Ophis treikam jong ka JHDS kaba don ha Lumbihsyntu, Mimyntdu West Jaiñtia Hills District ha ka 22 tarik u Nohprah 2023.
Kumban shu pynkynmaw, ka JHDS ryngkat bad ka Jingïatreilang bad ka KHUBLEI Germany ki la ai jingïarap ïa ki khynnah kiba don jingduna ha ka ïoh ka kot da kaba pynshongskul ei naduh Class-I haduh Class-XII, bad mynta u snem ki la don haduh 134 ngut ki khynnah kiba ïoh jingmyntoi na kitei ki ar tylli ki Seng.
Ïa ka prokram ha kane ka sngi la pynïaid da u Bah Denis Kurkalang, Coordinator ka JHDS ha ka jingïadonlang u Director ka JHDS u Fr. Manbha Pakem nalor ki staff bad ki dkhot ka JHDS. Hadien ka jingïalang ba lyngkot la don ruh ka jingot ïa u Cake Christmas bad sam ruh ïa ki jingai sngewbha sha ki 134 ngut ki khynnah kiba wan na ka longïing baduk.
Ha ka bakut jong ka prokram la ïoh ruh ïa ka jingrwai pynbyrngïa da u Kaitor bapawnam ka Jylla u Bah. Banker Kharkongor.
