Jowai, Nohprah 22: Ka Sarot I Man kawei na ki kynhun jong ki shi paralok kaba don ïa ka thong ban ïarap katba lah ka bor ïa ki briew hapoh ka Ri-Lum Jaiñtia, na ki por sha ki por kala juh leit ban ai jingïarap khamtam sha ki thaiñ nongkyndong kaba la juh ai jingïarap da kaba synñiang snam.
Ha kane ka 20.12.203 kane ka kynhun kala pynlong ka jingai snam ne ka Voluntary Blood Donation Programme ha Jowai Civil Hospital Blood Bank West Jaiñtia Hills District kum shi bynta ka jingrakhe ïa ka jingdap 3 snem ka seng.
Ha kane ka sngi la don ka jingïalang kaba lyngkot kaba la pynïaid da u ma Ram Sumer uba long uwei na ki dkhot ka kynhun ha kaba la ïoh ïa ki jingkren na u ma u Riquoma Rq. Laloo, uba la ïathuh kane ka seng kan dap 3 snem pura kata haka 25.12.2023, kumta kum ka jinglehkmen ïa kane ka jingdap lai snem jong ka seng ki dkhot jong ka, ki kwah ban leh kmen da kaba ai jingïarap ïa kiwei de ki para mynsiem kumta kila pynlong da kane ka jingïasynñiang snam.
Na ka liang jong u ma Riquoma ula khot bad pynshlur ïa kiwei de ki briew ba kin wan shakhmat ha ka ban ai snam, namar ka jingai snam kan long ka jingïarap kaba khraw ïa kiwei pat ki para mynsiem kiba donkam kyrkieh ïa ka snam haka pang ka shitom.
Ha kane ka sngi la ïoh ruh ïa ka jingkren na ka Doctor Patricia Shylla, Medical Officer ba dei peit ïa kane ka Blood Bank, Jowai, kaba la ai ki jingbatai katto katne shaphang ka jingai snam, la ïoh ruh ka nguh blei na u ma u Kyllimot Lhuid bad ki kyntien ai khublei na u ma Ram Sumer.
