Da ki jaiñkup syaid sam ka SRS Ri Bhoi sha ki longiing ba duk shuwa ka jinglehkmen khristmas
Nongpoh, Nohprah 22: Kum shibynta ban don bynta lang bad kiba bun ki longiing ba duk ba rangli ha shuwa ka jinglehkmen khristmas, ka Synjuk ki Rangbah Shnong Ri Bhoi District kala shim ïaka sienjam ban sam da ki jaiñ kup syaid sha ki longiing ba duk ba rangli bad ki riew tymmen jong ki 3 tylli ki Shnong ha Ri Bhoi ba kynthup ïaka Shnong Ïewmawlong, Umjarasi bad Umsaw Nongkharai haka jingïalang kaba la long ha ïing Dorbar ka shnong Iewmawlong.
Ha katei ka jingsam ïaki jaiñkup syaid la wan ban sa khi da ka jingdonlang u Arpit Upadhyaya Deputy Commissioner ka Ri Bhoi District, Bah BB Makdoh Chairman ka Synjuk ki Rangbah Shnong Ri Bhoi District, Bah Rayonald Kharkamni Secretary Nongpoh Town Committee, Angelus Sun Rangbah Shnong Umsaw Nongkharai, Bah Moris Lyngdoh Rangbah Shnong Umjarasi, Bah Viky Syngkli Rangbah Shnong Ïewmawlong bad kiwei kiwei ki riew Rangbah bad ki Rangbah Shnong naka them Ri Bhoi.
Ka jingthmu jong ka Synjuk ki Rangbah Shnong ban sam da ki jaiñkup syaid kaba dei ruh ka sienjam ba nyngkong kadei namar ba ki kwah ba ki longiing ba duk ba rangli kin ioh ban lehkmen lem ïaka khristmas bad kum ka Synjuk kan dang bteng ban leh ïa katei ka kam ba bha ban sam da ki jaiñ kup syaid sa sha ka thaiñ 20mer bad Byrnihat haka 30 tarik mynta u bnai.
Haba kren ha katei ka sngi naka liang u DC ka Ri-Bhoi u Arpit Upadhyaya u la pynpaw ka jingsngewkmen bad ai ka jingïaroh ïa ka Synjuk ki Rangbah Shnong kaba la shim ïaka sienjam ban sam da ki jaiñ kup syaid sha ki longing ba duk ba rangli bad kumjuh ruh ki riew tymmen kiba donkam ka jingïarap ba kum ka bor district ka pyrto ïaka kam kaba ki trei bad shakri sha ka imlang ka sahlang bad ban dang ïa treilang naka por shaka por.
Naka liang u Bah BB Makdoh Chairman ka Synjuk ki Rangbah Shnong u la ong ba kum ka kynhun ka dei ka sienjam kaba nyngkong ba kin leh kum katei ka kam ba bha bad kyrmen skhem watla ka dei ka jingai kaba rit, kitei ki longing kin pdiang da ka jingïeid bad ka jingkmen ba u Blei un dang ai haki ka met kaba koit kaba khiah ba kane ka khristmas kan wanrah ka jingkmen bad ka jingkyrmen ïa baroh lang.