SHILLONG, Lber 06: Ka Shillong Lajong FC kan ïakhun ïa ka jingïalehkai kaba bud jong ka pyrshah ïa ka Churchill Brothers mynta ka sngi ha ka I-League. Kane ka jingïalehkai kan sdang ha ka por 4 shiteng janmiet ha Raia Stadium, Goa.
Kane kan dei ruh ka jingïalehkai kaba saw sien lynter ïa ka Lajong shabar nala ïing bad hadien ka jingïakhun shitom ban jop da 4-3 kol ha ka jingïalehkai ba khatduh pyrshah ïa ka Gokulam Kerala, ka kynhun kan khmih lynti ban pynneh ïa ka lynti jong ka jingjop ynda ka aireng pyrshah ïa ka kynhun na Goa mynta ka sngi Palei.
Ha ka jingïalang shuwa ka jingïakhun na ka liang jong u coach ba heh duh jong ka Lajong, u Jose Carlos Rodriguez Hevia u la pynpaw hadien ka jingjop pyrshah ïa ka Gokulam Kerala ha kaba ka kynhun ka la lah ban synshar ïa ka jingïalehkai, u la ong, “ Ngi la ïalehkai bha, bad Ngi la ïakhun shitom haduh da sawa ka jingput (whistle) ba khatduh, kane kan long ka jingïakhun kaba pher namar ba ka Churchill ka don ha khlieh duh jong ka miej ïakheiñ poiñ”, hynrei watla katta ruh u don ka jingkyrmen kaba skhem ba kumno ka kynhun jong u ka la ïalehkai bad kan ïakhun tyngeh ban khur pura baroh lai point mynta ka sngi.
Mynta ka Lajong ka don ha ka kyrdan kaba 5 ha ka miej da kaba kamai 26 poiñ na ki 17 tylli ki jingïalehkai bad ka bud nadien ka Namdhari FC kaba wan ha ka kyrdan ba 4, kaba tam ïa ka Lajong tang da ka rekod H2H (lane ka rekod jop ha ki jingïalehkai ba ki ïakynduh pyrshah para maki), katba ka Churchill Brothers mynta ka don ha khlieh duh da kaba 31 poin na ki 17 tylli ki jingïakhun.
Ka sien kaba khatduh ba kine ki arliang mamla ki la ïakhun ka la kut noh ha ka jingïakhaid da mar 2-2 kol ha Shillong.
Kane kan long ka jingïalehkai kaba itynnad bha na ka bynta ki riew ieid phutbol ban peit namar ka jingjop ïa ka Lajong kan kyntiew ïa ka sha ka kyrdan kaba 3 ha ka miej bad kan pynduna sa tang 2 poiñ ka jingïapher bad ka kynhun kaba wan ha khlieh duh, katba ka jingjop ïa ka Churchill Brothers kan nang pynskhem ïa ka ban ïalam ha ka kyrdan ba ha khlieh duh.
ïa kane ka jingïalehkai yn pyni live lyngba ka Sony Sports Channel, SSEN mobile app bad na ssen.co website.
