Shillong, Lber 06: Wat hadien ba ka Nongrim Hills SC ka la shah lamkhmnat la palat shi kynta ha ka jingïalehkai hynrei ki la lah ban wanphai ban pynliem ïa ka Ryntih FC da 6-2 kol ha ka jingïalehkai ba khatduh jong ki ha ka OC Blue Shillong Premier League 2024 kaba la long ha madan First Ground – SSA Stadium, Polo, ha ka sngi Palei.
U Caldolan Kharmawphlang (15′) u la buh hakhmat ïa ka Nongrim Hills shuwa ba ka Ryntih kan pynphai ar kol lyngba u Wanshanlang Dkhar (21′) bad u Basuklang Bina (28′) ban lamkhmat kylla ïa ka jingïalehkai. Kumba la long ha ki jingïalehkai ba ladep, sa shi sien pat ka Ryntih ka la mad biang ïa ka jingshah pynshitom ha ka kylla miet ha kaba ka la shah thep haduh 5 kol kiba la wan lyngba u Onyxson Buhroy (66′), u Oresterwell Langshiang (71′, 78′), u Mebanshan Suting (74′) bad u Banshemphang Kurbah (85′) kaba la pynïoh ïa ka Nongrim Hills ban khur ïa ka jingjop.
Kane ka jingïalehkai ka dei ka jingïalehkai ba khatduh ïa kine ki arliang mamla. Ka namjop ka la kyntiew ïa ka Nongrim Hills sha ka kyrdan ba hynñiew, da kaba bujli ïa ka Sawmer SC kaba la hiar sha ka kyrdan ba phra. Katba ka Ryntih, kaba la thikna ban wan sha trai duh la ka jia sa kumno kumno ruh ha kane ka jingïalehkai, kam shym la lah ban pynkut ïa ka samoi da ka jingjop bad ka la pyndem da kaba mad ïa ka nam rem kaba 16 ha kane ka OC Blue SPL 2024.
Ka jingmareh kaba biang por jong u Caldolan ka la pynurlong ïa ka kol kaba nyngkong, katba ki rangïalehkai jong ka Ryntih ki dang sangeh namar ba ki dang pyrkhat ba uwei u rangïalehkai ka Nongrim Hills u la don ha ka liang offside, ïa kaba u Caldolan u la shim kabu ban pynkhih jlang ïa ka kol kaba nyngkong.
Hynrei ka Ryntih ka la wanphai ban lamkhmat kylla ïa ka jingïalehkai shuwa ban jam sha ka 30-minit. Ka jing pashat bol kaba thikna na liang kadiang ka la plie lad ïa u Wanshanlang ban rah ïa ka bol hapoh phyllaw kol shuwa ban thep. Hadien nangta u Basuklang u la pynkhih ïa ka kol kaba ar hadien ba u la ïohpdiang ïa ka bol ba la pashat da u Wanshanlang. Haki 17 tylli ki jingïalehkai ba ladep, ka Ryntih ka la ïohlad ban thep tang shi kol ha ka kylla step bad ha kane ka jingïakhun ka la lah ban thep ar kol tang ha kawei ka jingïalehkai.
Hynrei kine ki ar kol ki la long pynban ka jingtim ïa ka Ryntih. Katba ka jingïalehkai ka dang ïaid, ki rangïalehkai jong ka ki la sdang ban thait noh; sa shi sien pat ka kynhun kam shym la don player ba kan bujli.
Ka Nongrim Hills ka la dei ban ïoh pynïakhaid hadien ba uwei na ki rangïalehkai jong ka u la shah pynur (foul) hapoh phyllaw kol hynrei u Bankitboklang Nongrum u la pynsyrwa kai ïa ka penalty kaba lait sharud. Watla katta ruh, ka kynhun ka la hap ban ap tang katto katne minit shuwa ba kan ïoh pynïakhaid, lyngba u bak jong ka, u Onyxson.
Hadien kata u Derick u la shah tynjuh bad ïada ïa ar tylli ki jingma khlem da lah ban tehlakam bad bat skhem ïa ka bol bad u Oresterwell u la shim kabu bad thep jlang ïa ka bol kaba la wanpoi ha kjat jong u. Nangta u la ïarap pynbuh bol ïa u Mebanshan ban pynkhih ïa ka kol kaba saw na bynta ka Nongrim Hills. Khyndiat minit shuwa ban kut ka por u Oresterwell bad u Banshemphang ki la thep ïa ka kol kaba san bad kaba hynriew ha ka por ba ka Ryntih ka la ïakhun sa tang 10 ngut ki player hadien ba u Maxy Warjri u la hap ban sangeh namar ka jingmynsaw.
Ka jingïalehkai mynta ka sngi kan long hapdeng ka Laitkor SC bad ka Nangkiew Irat SC ha ka por 1:45 baje mynsngi. Ka Laitkor ka la jop ïa ka 1st Leg da 2-0 kol ha ka 23 tarik Risaw.
