I-League: Khmihlynti ka Lajong ban wanphai jingjop ha ka sien ïakhun ba ar pyrshah ïa ka Inter Kashi

Shillong, Lber 21: Ka kynhun ïalehkai phutbol na jylla- ka Shillong Lajong FC kan ïakhun biang ïa ka lympung I-League mynta ka sngi ka ban long pyrshah ïa ka Inter Kashi ha ka por 7 baje janmiet ha Kalyani Stadium, Kolkata.
Shuwa ban jam sha kane ka jingïakhun ka Lajong ka la ïakhaid bad ka Namdhari FC ha ka jingïalehkai ba ladep bad ka dang ïaineh ha ka kyrdan ba 6 ha ka miej ryngkat ki 31 point ba ka la khur naki 20 sien ïalehkai (8 jop, 7 ïakhaid bad 5 shah rem).
Haba ai jingkren hynne ka sngi na ka liang u Head Coach ka Lajong-Bah Bobby L Nongbet u la pynpaw ïa ka jingsngew skhem halor kane ka jingïalehkai ka ban long mynta ka sngi bad u kyrmen ban ïoh ïa ka resol kaba seisoh mynta ka kynti hadien ba shah rem ha ka wat kynduh ba nyngkong (1st leg) ha ka por ba kine ki ar kynhun ki ïatyngkhuh ha madan SSA Stadium-Polo, Shillong.
Kumban shu pynkynmaw, ha ka 3 tarik u Rymphang ka jingïakhun kaba la long ha nongbah Shillong, ka Inter Kashi ka la jop da ka said ïa ka Shillong Lajong FC, kata da 1 kol ban khur pura ïa ki lai point.
Haba phai pat sha ka Inter Kashi, ka bat ïa ka kyrdan ba 5 ryngkat ki 36 point ba ka la ïoh ban khur naki 10 sien jop, 6 sien ïakhaid bad 5 sien rem na baroh 21 ïalehkai mynta ka samoi.
Baroh ar kynhun ki khmihlynti ban khur shalade ïa baroh lai point na kane ka jingïalehkai mynta ka sngi bad ban nang pynskhem shuh shuh ïa ka kyrdan jong ki ha ka miej. Ka jingïapher hapdeng kine ki ar kynhun ka long ba ka Inter Kashi ka lamkhmat da 5 point ïa ka Lajong ha ka miej.