3rd North East Games: ïai bteng ka jylla Meghalaya ban khur takma ha ka Athletics

Shillong, Lber 21: Ka jinglah ban lehkai bha ki rang bad thei ïalehkai ha ka thup jong ka Athletics ka la nang ïai kyntiew ïa ka jingïoh khur takma ka Meghalaya ha kane ka 3rd NorthEast Games 2024 kaba long ha Nagaland.
Hynne ka sngi ka kynhun ki nongïalehkai ka jylla kiba mihkhmat ha ka Athletics ki la ïoh ban khur 3 tylli ki Rupa bad 5 tylli ki rnong.
ïa kine ki takma ha ka thup ïalehkai jong ka Athletics la khur da u Skhemlang Suba u ba la wan ba ar ha ka jingïakop mareh kaba 800M jong ki shynrang. Ha kane ka jingïakop mareh na ka liang jong u Skhemlang Suba u la lah ban pyndep hapoh 1.59.14 sekon.
U Primus Ronghi u la jop takma rupa ha ka High Jump Men, hadien ka jinglah ban kynthih ïa ka jingjrong kaba- 1.82M. Nangta ka Rinalis Ingti ka la khur takma rupa ha ka High Jump jong ki kynthei, ka jingjrong ba ka la lah ban kynthih ka long- 1.43M.
U Eleven Dkhar u la wan ha ka kyrdan ba lai ha ka jingïakop mareh ba 800M jong ki shynrang, bad ka por kaba u la lah ban pyndep ka long – 2:00.14 sekon, kaba la biang ïa u ban khur ïa ka takma rnong.
Ka Glorify Kurbah ka la jop takma rnong ha ka jingïakop mareh ba 800M jong ki kynthei, hadien ba lah pyndep ïa ka jingmareh hapoh- 2.22.83 sekon. Ka Sibilda Maring ka la wan ba lai ha ka High Jump jong ki kynthei, ka jingjrong kaba ka la lah ban kynthih ka long- 1.35M ban pynthikna khur ïa ka takma rnong. U Pringchang N Sangma u la jop takma rnong ha ka High Jump ki shynrang, hadien ba kynthih ïa ka jingjrong kaba- 1.78M ban shim ïa ka kyrdan ba lai.
Nangta ka Meghalaya ka la ïohruh ban khur takma rnong ha ka 4X400M Mixed Relay ba la mihkhmat da u Donbok Shabong, u Eleven Dkhar, ka Glorify Kurbahbad ka Ritina Hanse.
Haduh mynta ka kynhun ki nongïalehkai Athletics ka Jylla ki la ïoh ban khur 2 tylli ki takma ksiar, 4 tylli ki rupa bad 8 tylli ki rnong, haba kyllumlang ki long haduh 14 tylli.
Haba phai sha ka jingïalehkai Badminton ki shijur ba ïakhun ha ka Men’s Double ba la mihkhmat da u Chirag bad u Gitchiak ki la shah pynliem noh ha ki shijur ba kynthup ïa u Lalrinmawma & Laldintluanga Tlau jong ka Mizoram.
Katba ha ka Basketball ki thei ïalehkai ka jylla ki la ïai bteng ban synshar ïa ka Group da kaba bat kyrdan ba nyngkong. ïa kane la nang pynskhem hadien ba ka kynhun ka khur namjop da kaba suk pyrshah ïa ka Mizoram ban pynliem haduh 57/22 basket ha ka jingïakhun kaba long hynne ka sngi.
Ka Meghalaya ka don jingkyrmen ruh ban khur takma ksiar ha ka Boxing hadien ba u Bhalang Shadap ba ïakura ha ka kyrdan 67kg u la jop ha ka jingïakhun Semi Final ban ïohrung sha ka Final. Bad mynta ka sngi un sa ïakhun na bynta ka takma ksiar.
Ha ka Table Tennis: u Prithvi Dey u la ïoh ban khur takma rnong hadien ba jop kyrdan ba lai, nangta ha ka taekwondo ka jylla ka la ïoh ban khur takma rnong lyngba u Mahi karki u ba la wan ba lai ha ka thup kyrdan ïalehkai 48 kg…