La ïa im ia long ïa man ha kata ka juk kaba ka jingim briew da shisha ka long ka bym tikna,ym tip shi khyllipmat aiu lah ban jia, hynrei balei pat ki briew, katba u dang im, kim shim pat ïa kabu ksiar ban leh, ban mut beit tang da kaba bha.
Ki jingjia bym juh bna koit, kine khlieh la ka sngi ki la wan ban jia, ka tuh ka thiem, ka shoh ka pynïap, la kum ba ïa im ha kum kata ka kynja juk, kaba um don jingtieng, jingsmiej shuh ïaka nongkylliang kaba la ap lypa kaban wan ha ka jingim.
Kum ka jaidbynriew, kaba dang bat dang snoh bha hala ka jong ka khieñ kur ka kheiñ kha, ka tip briew ka tip Blei, sa shisien ka takhuh biang bad ki eriong ki erngit, jong kata ka rongphong kaba wan ba kan beh na kylleng sawdong, kat shaba phai, ym lah shuh ban peiphang kaei kaba dei bad kaei kaba lait, namar ba baroh baroh la shu pynskan hok jubor ñala ka jong ka nia ka jutang, kaba ha lyndet, don pat ka jingthmu ban ioh myntoi tang malade shimet.
Kaba kham ima lei lei iala ka jong ka jaidbynriew ha kum kane ka juk kaba mynta, dei ka dak jingsdang ka thok bad lamler, kaba ym salia shuh ba im-im ne peit-peit ban ïeng shisha da ka thok ka shukor, bam sap bam klop ïaka um syep jong u duk u rangli, u shem jynjar u shem lanot, ñion naphang lin ia u rit bad u tlot, ha kaba ka nongrim hikai ban im sngi im hok shi beit shi lynti ban kamai ïaka hok, kam don shuh, pynban ba la khwan myntoi palat eh, kata ka mynsiem rhah ïaka spah bym hok.
Ka daw kaba pynlong ïa ki briew ban im da kane ka lynti bym hok shuh hala ka jingim, ka dei ba ha ki kim don shuh ïaka raiñ ka rem, kim salia shuh ban iuh bad thom iaka hukum Blei, pynban wei shu sdang kiew, kiew skong ka mynsiem sarong kaba ha nga mei, ba kat ma nga ym duh shuh ha kane ka sla jong ka pyrthei. Kine ki jingjia, ksam ïa ki thied jabieng bym lah shuh ban poi pyrkhat ba pleng ba ha kum kane ka jaidbynriew, kaba dang don ïa ki snap kata ka jingïajan ba maïa bad la u nongbuh u nongthaw, ba ki dang bnud ba kin thom pat ïaka sang ka ma.
Hynrei kum kine ki briew ki klet baka nongkylliang kaba kin sa ïoh, kaba ha ki akher jong ki sngi, kin niew kin tang iala kajingim kaba shempap, kaba u kur u kha, u marjan u marpa, un da I syrtok shisha ïaka jingim jong kum kine ki briew, kiba ka bainong ba ki la leh, kane mynta ki la ïoh pdiang lypa ha ka jingim.
Kaba ima lei lei ha kum kane ka juk shai kaba mynta, dei ka jingim ba lyngkar kynthei bad shynrang, ki ïaid ruma ki ïaid rutit, kim tip shuh ïaka miet ka ïa, ki klet ïa ka tien sneng ka tien kraw jong ka kmie u kpa, ki phaidien ïaka hukum ka jong ki, namar ha ki la sur matlah shisha tang da ka rongphong pyrthei.
Kat shaba ki ïaid kat shaba ki ïeng, ym ithuh shuh la kynthei ne shynrang, kine shu hai hai, la kum ba jngi ha ki lyoh, kim tip shuh ïaka miet ïa ïong, ki klet ïala ka ïing ka sem, kim salia shuh ban ri sumar kyndong ïala ka nam thei sotti, pynban ha ka jingim ban ïoh mad ïaka sngewbha ki da klet shisha wat ïala ka jong ka kheiñ kur ka khein kha.
Hynrei ka jingeh kaba ki khun samla ki ïakynduh ka dei ba don pat ki khep, ba ïaka jingim kaba dang shu sdang ban phuh, hynrei la lap ba kdiah jubor noh ïaki, hangne kyndit bynriew ka shong ka thaw, sah shisha satang ka pur khana kiba har rukom, kaba ka nam ba bha jong ki, da lei lei um lah shuh ban lap dien trai, hynrei kit pap sah tang da ka nam sniew shi rynjaiñ.
Dei haba la mad pat ïaka bainong , ba sa sdang ka kdew kti ne ka kynnoh pat ïa kiwei, sa sdang ka ïamrem pat hala marwei, ne ban ud ban nam kylla ïa la ka jong ka jingim, pynban ka nongkylliang kam juh ap shisha ïano ïano ruh, hynrei ka kloi ba kan trei ïala ka jong ka kamram ka jong ka.
Lada sbu ïakren shisha hangne, aiu sha ha lyndet ba u bynriew um lah ban leh tang ïa kaba bha ha ka jingim, ka jubab ïa kane ka dei, ba ha ka mynsiem bad ka dohnud, la rung ka bishni ka pihuiñ, ka ïbeiñ ka I khoh ïa kiwei. Katno tam lei lei haba u marjan u shem bha u shem miat, duh thiah duh dem, sdang pat saka lorni ne ban thaw ktien kiba kynsha, namar bym lah shah ban ïohi ne shem ba kiwei ki shem bha katba lade li-li pen-pen, im ka jingim kaba shu alhia ba khlem khih khlem ksar, kaba shu lorni ia kiwei hyrnei ba klet noh pat ialade.
Kumta katba ka por ka dang biang, ko para jaidbynriew, ïeng kyndit thiah noh sa shisien, ka jaidbynriew ka donkam biang ban ïeng ha ka nongrim ban im ka jingim ba khuid synlar, bym nym don satia kano kano ka dak thohbria, namar ka jingwan ban long briew sha kane ka snieh jong ka sla pyrthei, ka long wan lyngkhuid hap ruh ban leit lyngkhuid, ha kaba kaei kaba la wan ban im bad sah shipor ha kane ka sla ka pyrthei, hap ban im ne ban leh shisha kat kum kata ka hukum na u Blei, ha kaba ka nam ka kyrteng ruh kan da sien ïewbih bad neh shisha ka nam ba bha bad ïai pyrto sah da baroh lang.
