Ka Jaitbynriew Jaiñtïa, ka dei ka wei na ki jaitbynriew kaba riewspah tam, ym tang ha ka ïoh ka kot, ha ki mar ki mata, ka riewspah khamtam ha ka ktien ka thylliej bad ka burom ka akor. Haba phai sha ka ktien ka thylliej, naduh hyndai hynthai ki longshuwa jong ngi, ki don ka jingkitkhlieh ban wanrah ha ka thoh ka tar ne ka pule ka dangle, ïa ka ei ka ei kaba ki pyrkhat. Ki jingthoh ki jong ki, da ki script ne ki dak thoh jong kiwei, ka pyni shai kdar ba ki ieid ïa la ka jaidbynriew. Kumba ong ka ktien – ‘Ka jaitbynriew kaba ka ktien ka thylliej jong ka, kadon ha jingthoh, kadei ka Jaitbynriew ka ba Im’. Te haduh mynta, ka jaitbynriew jong ngi ka im bad kan ïai im da kaba khlaiñ shuh shuh, halor ka nongrim ban burom ïa la ka jong bad ban ym isih ruh ïa ka jong kiwei.
Ka burom ka akor, ka dang ïaineh ïaisah ha ka mynsiem, uwei pa kawei ki khun ka Jaitbynriew hapoh ka Ri Jaiñtia. Ka burom ka ba ha khmatduh kadei, ba ki tip ban burom ïa ka Bei Rymaw, kaba bsa bad ai ïa ngi ïa ka ei kaba ngi donkam.
Ka jingpynkhie im biang ïa ka Chad Sukra da u Dolloi bad ka Señraij Jowai, ka long kawei na ki lad ban kyrsiew thiah ïa ka Jaitbynriew, da kaba rat dyngkhong ïa ki jingsniew kiba pynjot ïa ka Bei Rymaw. Ha ka Chad Sukra hi, man la ki snem, ka mat pdeng ka jong ka, dei ban burom bad ieid ïa ka Bei Rymaw. Naduh hyndai hynthai kulong kumah, ka pyrthei ka dang long kaba hok ba sati, ki briew ki im ha kawei don ka sur “Tipbriew Tipblei”, ki ïarap iwei ïa iwei, na kawei ka jaka sha kawei pat, ymdon kata ka mynsiem arsap arphong; Ki dem hok ha la ki jingtrei ban ioh bam, kim don por ban ïa lorni ïa ki kam jong kiwei, ki sngewtynnad ban ïa pyni ïa la ki jong ki jong ki sap ki phong hadien ba ki la dep ka trei ka ktah. Ki shait ïa pyndom iwei ïa iwei, ki shynrang ïa ki kynthei ne kynthei ïa ki shynrang tang ban pynlut por ban lap ka miet. Kimdon baje, kim don kot ne khulom ban thoh, hynrei ki tip thik thik ïa ka por, ïa ki sngi ki ïa. Ki pyntrei kam ïa ki saw aiom jong ka snem, katkum ki por ki jong ki, ryngkat ka nguh ka dem, ka duwai ka phirat ïa u Blei nongbuh nongthaw bad ïa ka Rymaw.
Kumba ki sngewtynnad ïa ka put ka tem, ka rwai ka siaw bad ka shad. Kumta, ki pyndon burom ïa ka Bei Rymaw ha shwa ban pynhap ïa u symbai sha lyngkha da ka shad ka kmen, ka nguh ka dem, ban bha ban miat ka thung ka tep ka jong ki. Haduh mynta, ngi tip ba ka Chad Sukra la pynlong ïa ka, ha shwa ban rep ban thung. Kadon ruh ka jingmut kaba kongsan “Ban pynneh pynsah ïa ka Dustur ka Riti, ki Matti jong u Longshuwa Manshuwa” ba u la hikai ïa ka pateng ban ïa burom kylliang iwei ïa iwei bad ban pyndonkam hok ïa la ki jong ki Sap ki Phong da kaba hikai ïa kiwei ïa kaei kaba bha tam.
La thaw ïa ki jingrwai kiba kit jingmut bad pyndait ïa ka jingshad ban pynshohbieit ïa ki khmat ki nongpeit. Ymtang kata, ka jingïa ieid bad burom, ka pynkhraw ïa ka jinglehkmen ïa ka Chad Sukra. Ka long ruh kawei na ki dak ban burom ïa ki Nongrep, namar khlem ma ki, ngin ymïoh jingbam ban bam. Ki jingduwai na ka bynta ka jong ki, ban bha ka khyndew ka shyiap, ban biang ki um ki wah ban shngaiñ ka met jong ka Bei Rymaw. Haba ïashad ïaleh sngewbha, ka mynsiem ki nongshad naduh kiba ïashimbynta ha rynsan haduh kiba shad surok, naduh ki khynnah haduh ki rangbah, ki don ka jingsngew ïajuh ïajan para jaitbynriew ha ka bri u Ñau Wasa u Ñau Wasung.
Kumba ka matpdeng jong ka Chad Sukra mynta ka snem, “Ka jingkohnguh ïa ka Hukum Blei, ka Lynti ka Jingsuk ha ka Pyrthei”. Ka jingsuk kan ym wan, lada ngimïoh ïa ka jingbam; ka jingbam ngin ymïoh, lada ngim ïada bad sumar ïa ka Bei Rymaw. Kane kadei ka jinghikai kaba ngi la ïoh naduh hyndai, balei ngi khot Mei ïa ka Rymew; namar kadei ka nongbsa bam ïa baroh ki ba im ba khih ne kiba don mynsiem.
Shibun kiba tip ban burom ïa ka Rymaw bad shibun ruh ki bymtip. U batip ban burom ïa ka Rymaw, don kipor ba u klet, ïa ka ei kaba u leh sniew halor jong ka, u bymtip ban burom, don ki por u kynmaw ïa ka jingkordor ka jong ka. Namarkata, lyngba kane ka Chad Sukra, to ngin kyndit bynriew da kaba sneng naduh ïing haduh kino kino ki jaka ba ngi don, banlong kiba lehkhuid, ymtang ïa ka met ka jong ngi, hynrei ïa ka met jong ka Bei Rymaw ruh.
“To ngin don ka mynsiem kum ki riew hyndai, ka bakhuid kaba suba, ymdon arsap arphong, na ka bynta ka bha ka miat jong baroh lang, kaba ki la hikai ïa ngi, ba ngin ïengtylli kawei, ka Jaitbynriew, ban im ka mynta bad ka lawei”
