Daka jingïakop mareh, pynphriang khubor ka tnad PHE halor ka jingkordor ban pynneh pynsah ïaka um

Nongpoh, Lber 21: Kum shibynta ka jingrakhe ïaka sngi kyrpang ban pynneh pynsah ïaka um ne ka “World Water day”, ka ophis jong ka tnad PHE Ri-Bhoi District, haka jingïatreilang bad ka ophis u District Sports Officer mynta ka sngi ka la pynlong ïaka jingïakop mareh Marathon haki kyrdan bapher bapher ïa kaba la sdang naduh ka por 6 baje mynstep.
Ïa katei ka jingïakop mareh marathon la sdang na Mini Indoor Stadium Saiden bad pynkut pat haduh Indoor Stadium Umlyngkdait bad la wan ban kaweh lama kum ka dak jingsdang da ka kong Evangel Kharkongor District Project Manager PHE Nongpoh, haka jingiadon ryngkat lang ki nongtrei naka tnad ïalehkai.
Naka liang ka kong E Kharkongor kala ong ba lyngba kane ka jingiakop mareh, ka tnad PHE, ka don ïaka jingthmu ban pyn saphriang ïaka khubor halor ka jingdonkam ban tyngkai ïaka umbam umdih kumba ka phang pdeng jong ka World Water Day ka long “Water for Peace” kaba mut mangi kum ki nongshong lada ngim don ka um kaba bit kaba biang ngim don ka imlang ka sahlang kaba suk kaba kmen, kaba lah ruh ban wanrah ka thma bad ka jingkajia kumta ka jingtyngkai ïaka um ka long kaba kongsan bad kaba donkam eh.
Ha kane ka jingïakop marathon naka liang ki shynrang u samla Monas Bongrung u la khur ïaka nam ba nyngkong, u samla Ennistar Sohshang u la wan ba ar bad u samla Jamor Makri u la wan balai bad haka thup jong ki kynthei ka Samla Jilina Bongrung ka la wan ba nyngkong, Ka Samla Rosa Malai ka lawan ba ar bad ka samla Filinza Hansepi ka la wan balai.
Shuh shuh ka kong Talina Shadap kala ioh ïaka nam kum ka nongïashimbynta ba rangbah tam bad u Joshwa Lyngkhoi ba dang khynnah tam.
Kum ka dak ban nang ai mynsiem ïaki nongïashim bynta ha kane ka jingïakop mareh naka liang ka tnad PHE kala pynkhreh ruh ïaki khusnam ban sa sam pat lashai ka 22 tarik Lber haka jingrakhe ïaka World Water Day ha Nongpoh.