Hynrei buh dak jingkylli, halor ka jingïatip lem ba beh kam ïa 40 ngut ki nongtrei
Kmen u Bah Titos ba pynkiew tulop ka EC ïa ki Casual
Shillong, Jylliew 20: U MDC ka Sohra uba dei ruh u nongialam ka liang pyrshah hapoh Khasi Hills Autonomous District Council (KHADC) u Bah Titos W Chyne u la pynpaw ka jingkmen halor ka jinglah jong ka Executive Committee ban kyntiew ïa ka tulop ki nongtrei Casual jong ka Council.
Kum ban shu kdew ba ki nongtrei Casual ha KHADC naduh ba ki sdang ban trei nyngkong eh ka tulop ba ki ioh kadei tang T. 5 hajar, hynrei mynta hadien ba la kyntiew ka EC ki nongtrei Casual kin ioh T. 10 hajar.
Haba wanrah ïa ka Cut Motion ha ka 19 tarik u Jylliew kaba dei ka sngi ba khatduh jong ka Dorbar Lyiur u nongialam ka liang pyrshah u Bah Titos W Chyne u la pynpaw ka jingkmen ba khraw ba ka EC ka lah kyntiew ka tulop I nongtrei Casual jong ka KHADC.
Halor ka jingkren u Bah Seibor Warbah halor ka jingkyntiew tulop ïa ki nongtrei ka Council ba kadei namar ka jingïatip lem, u Bah Titos u la ong ba lada phi don ïa kata ka jingïatip lem…..’Balei phi beh kam ïa ki 40 ngut ki nongtrei ka Council mar sien shimti ïa ka Executive Committee’.
Haba kren halor ka jinglut jingsep halor ki Legal Council, u Bah Titos u la ong ba mynta kane ka Executive Committee ka pynlut haduh T. 70 lak ban siew sha ki, katba mynshwa pat ki siew tang T.40 lak bad hato kane kam dei mo kata ka jingpynsyrwa kai ïa ka pisa.
Shuh shuh u Bah Titos u la buh ka jingkylli ba ïa u CEM ka Discretionary Grand (DG) u CEM u ioh T. 20 Lak ki para MDC pat ki ioh katno bad halor kane u EM ba bat ïa ka pla tyngka jong ka council u Bah Seibor u la pyntip ba la mang mar T. 3 Lak marwei ïa ki MDC.
U Bah Titos u la pynpaw ruh ba ki khun ki hajar jong ka Hima Sohra mynta ki lynga ki pisa namar ba kila kwah da u Syiem ba pura ba un synshar ïa ka Hima Sohra.
Shuh shuh u la ong ba ha ka por ba thang Syiem hadien ka jingkhlad u Paiem Freeman u Bah Titos u la ong ba hak ka por ba ai jingkren da u Executive Member u Bah Powel Sohkhlet kala ai mynsiem shisha ïa ki khun ki hajar hynrei wat hadien ba la dep ban leh ïa ka riti dustur mynta lah hynriew bnai khlem pat ioh bad ki khun ki hajar ka Hima mynta kila kwah noh da u Syiem ba pura.