Ka EC ka dei ban shimkhia ban pynkhie im bad pynjyrngam biang ïa ki khlaw: Kong Grace

Shillong, Jylliew 20: Ka MDC jong ka National People Party na Nongshken Constituency ka Kong Grace Mary Kharpuri kala kyrpad ïa ka Executive Committee jong ka KHADC ban shim khia bad ka sorkar jylla bad sorkar India na ka bynta ban pynkhie im biang ïa ki khlaw ki btap.
Haba kren ha ka sngi khatduh jong ka dorbar lyiur ka Kong Grace kala ong ba umba 95 % ki khlaw ki btap ki hap hapoh ka jingpeit jong ka Khasi Hills Autonomous District Council.
“Ka tnad Forest kadei ka tnad trei kam kaba kongsan bha ba khmih bad peit ïa ki khlaw ki btap, hynrei ka jingmang pisa jong ka Executive Committee ïa kane ka tnad ka long tang T.11 klur kaba dei kaba dang duna bha” ong ka Kong Grace.
Shuh shuh ka Kong Grace kala ong, “Tang T. 11 klur kumno ngin pynneh pynsah ïa ki khlaw ki btap bad ha ki por ba mynhswa ki dieng bad ki khlaw jong ka council ki rben bha hynrei mynta lah duna bha”.
“Ka por kam pat dier ban pynjyrngam biang ïa ki khlaw ki btap kiba hapoh hapoh ka jingpeit jong ka Council bad na ka liang jong ka Executive Committee kadei ban shim khia ban kyrpad ïa ka sorkar jylla bad sorkar India ban pynkhie biang ïa ki khlaw sa shisien” ong ka Kong Grace.
Shuh shuh ka Kong Grace kala ong ba ka Executive Committee kala dei ban pynsngew sha ka sorkar lyngba ki working plan scheme banpynjyrngam biang ïa ki khlaw.
Na ka liang jong u Executive Member ba bat ia ka pla tyngka jong ka Council u la pyntip ba la dep ban ïasoi ïa ka MoU bad kane ka Foundation ba sngewkhia ïa ka jingsyllen jong ki khlaw bad mynta kane ka kam ka lah iaid sha khmat.