Shillong, Jylliew 20 : Ka Meghalaya ka la long kawei na ki jylla ha kaba ïa ki projek kiba la bei pisa na bar ri ne ki Externally Aided Project (EAP) la saiñdur hi da ki samla jongka jylla, ïathuh u Myntri Rangbah ka jylla u Conrad K Sangma mynta ka sngi.
Haba kren sa ki lad pathai khubor mynta ka sngi ba pynhap pyrda ïa ka jingïalang mir jingmut ne seminar halor kaphang “ Leveraging Externally Aided Projects (EAP) ha kane ka thaiñ shatei lam mihngi, u Sangma u la ong hadien ba la ïoh jinghikai mynta la kumba shiphew snem ei ei ka jylla mynta ka la lait ban shaniah ban leh ïa ki kam saiñdur saiñdar ha kiba na bar namar ki jong la jong ki la tbit mynta.
“ Ha kaba sdang ngi hap ban wanrah ki briew na bar ban saiñdur ïa ki projek hynrei mynta pat kumba 90 % ki briew jong ngi ki la lah ban leh ïa ki kam da lade hi, La ai jinghikai bad pyntbit ïa ki bad mynta bun kiba trei ha kine ki projek lait noh khyndiat eh hangne hangtai la trei beit da ki briew jong ngi hi” ong u Myntri Rangbah.
U la ai burom ruh ïa ka sorkar pdeng halor kine ki projek kiba ka la ïarap sha kane ka thaiñ shatei lam mihngi ha kine ki 12 snem.
“ Lada ngi bishar bniah bha ngin shem ba ka jingbei tyngka bad ka jingroi jingpar ha kane ka thaiñ ka kiew bha ha kine ki 12 snem ba la leit noh. Kane ka long hadien ba u Myntri Rangbah duh ka ri u la shimti bad phai khmat ban kyntiew ïa kane ka thaiñ ïa kaba ym shym la don ba phai khmat ha ki por ba mynshwa” ong biang u Conrad.
U la ong ba ki skhim kum ka SASCI bad ka EAP ka la wanrah ka jingkylla bad ki long ruh kat kum ki rukom tei ne trei ha shityllup ka pyrthei.
“ ïa ka skhim SASCI lah ban ïoh ryngkat ki jingpynkylla, ym lah ban shu ïoh tang haba la pan. Phi hap ban pynshisha bad pyni haduh katno phi la pyndonkam hok ïa ka pisa”. ong u Myntri Rangbah.
U la ong ba ka jinghikai ïa ki samla ka jylla ba kin lah ban ïabeh kat kum ka rukom trei ki nongbar ri ka long kaba kongsan kaba la leh da ki tnad ne ki kompani bapher bapher.
“ Kane ka dei kaei kaba ka Myntri Kam Pla Pisa ruh ka la ban jur ba ngi donkam ïa ki briew la jong ba kin long kiba tbit ban pyntrei bad saiñdur ïa ki kam” u la ong biang ha ka jingïadon lang ka Myntri Kam Pla Pisa ka Nirmala Sitharaman.
U la ong ruh da ka jingdon ki briew la jong kiba la tbit ha ka kam kan ïarap ïa ka jylla ban ïoh shuh shuh ïa ki skhim na ka sorkar pdeng namar kin lah ban pyntreikam hok bha ïa ki.
