Hiar u MP ka AITC sha Mawkyrwat ban pan jingkyrshan ïa u Bah Sounder Strong Cajee

By Mawphor Editor On Feb 13, 2023

Mawkyrwat, Rymphang, 12: U Member jong ka Parliament (MP) hapoh ka Rajya Sabha na ka All India Trinamool Congress Party (AITC), u Dereck O. Brien ha ka sngi saitjaiñ jong ka taïew u la hiar sha ka shnong Mawkyrwat, South West Khasi Hills District ban ïalap elekshon ïa kyrtong jong ka All Meghalaya Trinamool Congress Party (AMTC) na ka 36 – Mawkyrwat Constituency, u bah Sounder Strong Cajee ha kaba ïa ka jingïalang la pynlong hapoh ka madan jong ka Nativity Higher Secondary School, Mawkyrwat, South West Khasi Hills District.
U Dereck O. Brien u u MP na ka AITC haba kren ha ka jingïalang u la ïathuh ba u la kren hapoh Rajya Sabha na ka bynta ka jingdonkam ka jaidbynriew Khasi ban ithuh noh ïa ka ktien ‘Khasi’ bad pynrung ruh ha ka khyrnit kaba 8 bad buh jingkylli arted ba, “Hato kine ki MP jong ka jylla Meghalaya ki la kren halor kane ka bynta na ka bynta ki mad jingdawa jong ka jaidbynriew Khasi?”. U la pynpaw ruh ba ka Ri India ka long thik kum ka kper syntiew ba i-tynnad bha bad kaba don ha la ki jong ki jong ki jaidbynriew bad ruh ha ka niam ka rukom kaba dei ka ri shynshar paidbah, kumta ka donkam ban ker ban da bha ïa ka bad ruh ban ïa long kawei.
Ula ong ruh ba balei kine ki seng saiñ pyrthei hapoh ka jylla Meghalaya ki ïa ïaid lang bad ka BJP ha kaba ka BJP ka la leh donbor ïa ki paid khristan bad ïa ki Ïingmane Blei ha jylla Assam, Chattisgarh, Uttar Pradesh bad kiwei de ki Jylla hapoh ka Ri India. “Lada ka AITC ka lah ban thaw ïa ka sorkar ha kane ka Jylla Meghalaya, ka ai bor ban synshar hi da ki briew jong ka Meghalaya na ka bynta ki paidbah jong ka Meghalaya, ym da kiwei ki briew kiba nabar jong ka jylla”, ong u Dereck O. Brien.
Ha kawei pat ka bynta u Dereck O. Brien u la pynpaw ka jingïaroh ïa ka Jylla Meghalaya, ka dong ka thaiñ Mawkyrwat namar ba ka long kaba i-tynnad shisha bad ka thong ba hakhmat eh jong ka AITC ka long ban wanrah ïa ka jingkylla na ka bynta ki longkmie bad ki samla lyngba ka WE-Card bad ka MYE-Card ka ban sa ai jingïarap pisa T. 12 spah manla u bnai, kata hadien 100 sngi lada ka AITC kan wan ha ka bor ha kane ka MLA Election 2023. U la ong ruh ka daw ba u wan hangne ka long na ka bynta ban pynsngew ïa ki jingthmu jong ka AITC ba ka kwah ban kyntiew ïa ka pule puthi bad ka koid ka khiah ha kane ka jylla bad kumjuh ruh ha Mawkyrwat, kumba ka AITC ha kiwei ki jylla ha ka jingsynshar jong ka ka la ïarap ei lut ïa ki dawai da shin ïa ki nongpang, ban puid ïa ki nongpang, lyngba da ka jingdon kawei ka Card jong ka longkmie ha manla kawei ka longïing bad na ka bynta ki khynnah skul pat kin ai jingïarap T. 10 lak ha ka sut kaba rit na ka bynta ki jingpule jong ki.
Haba kren shaphang u bah Sounder S. Cajee, u Dereck O. Brien u la ong ba une u dei u briew uba biang bha haba u la ïoh ban pule ïa ka kot ba la thoh shaphang u bah Rowell Lyngdoh (bam kwai ha dwar U Blei) bad ka ïing ka sem jong u, ki long shisha ki ‘riew khraw pyrkhat ïa ka imlang sahlang shibun ki kam ba ki la leh na ka bynta ka roi ka par bad ka jaidbynriew. “Pynlut ïa ka por 10 kynta haduh ban da dei ka por thep ïa ka vote, ha ka 27 tarik ka 10 kynta jong phi bad ka shi vote ka jong phi na ka bynta ka 5 snem ïa u bah Sounder S. Cajee ïa ka jingskhakri ïa kane ka Mawkyrwat Constituency kan long ka jingkyrkhu bad ka jingkylla ïa ka jaidbynriew baroh kawei”, pynkut u u Dereck O. Brien ïa ka jingkren.
U bah Sounder Strong Cajee u kyrtong ka AMTC na ka Mawkyrwat Constituency, u Samla Benjohnson Lyngdoh ki la ai jingkren ha kane ka sngi bad la ïoh ruh ban pdiang burom ïa ki paidbah kiba la wan pynïasoh thymmai noh ïa lade bad kane ka AMTC.
Ha kajuh ka sngi ka AMTC Youth’s Wing ka la ïoh ruh ban pynkup burom ïa ki samla kiba la wanrah ïa ka nam bad ka burom ïa ka distrik bad ïa ka jylla lyngba ki kam ïalehkai sports ha ki bynta bapher bapher kiba dei napoh jong ka Mawkyrwat Constituency.
Ïa kane ka prokram, la pynshit pynshngaiñ da ki jingrwai jong ki khun samla ha ryngkat da ka jingïadonlang ki paidbah kiba wan sngap ïa ki jingkren jong ki ‘riew rangbah na ka AITC.