Hiar shuki ka Sheikh Hasina kum ka PM phet rieh sha India da ka helikopter shipai

Dhaka, Nailar 05: Namar ka jingkhie biang ki kam umsnam ha Bangladesh kaba lam sha ka jingïap sa kumba 98 ngut ki briew tang ha ka sngi U Blei, ka Myntri Rangbah Duh ka Bangladesh, Sheikh Hasina, ka la hiar shuki noh kum ka Myntri Rangbah duh ka Bangladesh, ha ka sngi Nyngkong bad ka la phet krad syndon napoh ka Ri, kaba pynkut ïa ka jingsynshar jong ka, kaba la neh 15 snem.
Naduh ba khie ka jingïakhih pyrshah ïa ka jingbhah kam hapoh ka Ri ha u Naitung, haduh 300 ngut ki briew ki la ïap na ka jingïatakhuh bad pynibor pyrshah ïa ki bor pahara lem bad ki kynhun kiba kyrshan ïa ka Sorkar.
Ka Sheikh Hasina ka la phet krad napoh ka Ri bad ka la wan poi sha India da ka helicopter ki shipai. La ong ba ka Sheik Hasina ka la wan poi ha Agartala, Tripura bad ha ka por janmiet ka la pynpoi ïa ka sha nongbah Delhi da ki bor shipai liengsuiñ ka India bad pynsah ruh ïa ka ha ka jaka ba long shngaiñ.
Da ki hajar ngut ki nongïakhih ki la leit ther ïa ka ïingsah jong ka ha Ganabhadan, Dhala ha ka janmiet sngi Nyngkong hadien ba ka Hasina bad ka para ka Sheikh Rehana, kila dep mih ban phet sha ki jaka kiba shngaiñ. Ha kane ka jinghiar thma ki nongïakhih ïa ka ïing sah jongka Myntri Rangbah duh ka Bangladesh, ki la pynjot pynpra lut ia ki jingdon jingem, ki la tuh ïa ki tiar rem dor, ki shuki ki miej, ïa ki jngri jingdup, ïa ki dohkha, ki la bam lut ïa ki jingbam ba don ha ïing. Nalor kata ki la leit rung ruh shapoh ka Parlliament ka Bangladesh bad pynjot pynpra ïa ki shuki bad jingdon jingem katei ka ïing dorbar thawaiñ katei ka ri.
Ha kajuh ka por, u Army Chief General ka Bangladesh Waker-Uz-Zaman, ula pyntip ba ki shikai kin sa thaw ïa ka Sorkar ba shipor ban pynïaid ïa ka synshar khadar hapoh ka Ri.
Hynne ka sngi u Zaman ula ïakynduh ruh ïa ki nongïalam jong ki seng saiñ pyrthei bapher bapher kynthup ka Liang Synshar Awami League lem bad ka Liang Pyrshah BNP lem bad kiwei kiwei ki kynhun.
Kane ka jingïakhih ka la sdang da kaba jai jai ha ki taïew ba khatduh jong u Jylliew halor ka jingdawa jong ki samla pule ba kwah pynkut ïa ka jingbuh bhah ha ka thungkam Sorkar hynrei suki suki kala kylla long syndon sha ka jingïaumsnam hapdeng ki nongïakhih bad ki Pulit bad ki kynhun ba kyrshan ïa ka Sorkar ha Dhaka University.
Ka Sorkar ka pyrshang ban tehlakam ïa ka jingïakhih da ka bor, ki korphiw bad jingkhang internet hynrei kine kim shym la ïarap satia, kaba la nang ai ding shuh shuh haduh ba poi ka jingïap ki 300 ngut ki briew.
Namar kane, ka jingdawa ka la mih ba dei ban pynkut noh ïa ka jingsynshar jong ka Sheik Hasina ba 15 snem ha ka Ri.
Lah ruh ban ong ba na ka bynta ban tehlakam ïa kine ki jingjia jingïakhih na ka liang jong ka sorkar Bangladesh ka la pynbna ba ka la pynjari da ka Curfew kaba khlem pud sngi tat haduh ban da pynbna da kumwei pat bad kane ka jingpynjari kan treikam noh mardor.