Mairang, Nailar 06 : Kum shibynta ban kyntiew ïa ki khun samla ha ki kam lehkai sports, ka Pyndengumiong District Sports Association ha ka jingïalam jong u bah Lambok Nongrang, ka la pynlong ïa ka lympung ïalehkai phutbol kaba la tip kum ka 5th Tirot Sing Memorial Trophy Football Tournament ha madan Dommawlum jong ka shnong Pyndengumiong Mairang Eastern West Khasi Hills District.
Ha katei ka lympung la wan ban ïashim bynta da ki 16 tylli ki kynhun bad ki kynhun kiba ïalehkai ha katei ka sngi sdang kata ha ka 06 tarik Nailar ki long ka Thymmei Hynñiewtrep FC pyrshah ïa ka Pynnoh Ri War FC
Haba phai pat sha ka jingïalehkai hapdeng kitei ki ar tylli ki kynhun ka long kaba ïa khaid bad kaba itynnad bha kaba la pynshongshit ruh ïa ki paidbah nongpeitkai, ha kaba ha ka kylla step ka Thymmei Hynñiewtrep FC ka lah ioh ban pynkhih ïa ka jar ba nyngkong lyngba u Chesterpaul Lyngdoh ha ka minit kaba 27 bad ha ka kyllamiet ka Thymmei Hynñiewtrep FC ka la ioh biang ban pynkhih ïa ka jar kaba ar lyngba u Kordor Dkhar ha ka minit kaba 56 bad ka Pynnoh Ri War FC lyngba u Balajied Syiemlieh ka la ioh ba pynphai pat shi kol ïa ka Thymmei Hynñiewtrep FC ha ka minit kaba 87 jong ka kylla miet.
La wan ban sakhi ïa kaei ka lympung da ka jingdonlang u Syiem Khynnah ka Hima Nongkhlaw u Syiem K M Syiem, u President ka PDSA u bah Lambok Nongrang, u Sordar ka Pyndengumiong u Bah B Syiemiong, Secretary u Bah Risin Nongsiej, ki riew rangbah, lem bad ki paidbah nongpeitkai kiba wan kyrshan ia la ki jong ki jong ki kynhun.
