Da ka Korphiw miet pynjari ka Meghalaya ha shi lynter khappud Bangladesh

Shillong, Nailar 05 : Ka jingnang jur ka kynrum kynram ha Bangladesh ka la pynlong ïa ka sorkar Meghalaya ban pynjari da ka korphiw miet ba khlem buh por ha baroh shi lynter ka khappud jong ka Meghalaya-Bangladesh naduh ka janmiet 6:00 baje jong ka sngi Nyngkong haduh ka por 6:00 baje mynstep.
Haba kren bad ki lad pathai khubor ha ka janmiet sngi Nyngkong, u Symbud Myntri Rangbah ka Jylla, Bah Prestone Tynsong u la ong, “Kum ka jingpynkhreh lypa na ka bynta ka Jylla bad ruh na bynta ka Ri baroh kawei, mynta ka sngi, ngi la rai ban pynjari da ka korphiw ha baroh shilynter u pud u sam bad ka Bangladesh kaba sdang naduh mynta ka miet (Sngi Nyngkong) hi.”
U la ïathuh ruh ba ïa katei ka rai ki la shim ha ka jingïalang kaba la donlang naduh u Chief Secretary ka Jylla nangta ka Director General of Police bad ruh u Inspector General jong ki BSF.
U Symbud Myntri Rangbah u la ïathuh ruh ba katei ka korphiw kan treikam 200 mitar naduh u zero point lane u mawpud hapoh ka ri India naduh ka por 6:00 baje janmiet haduh ka por 6:00 baje mynstep man ka sngi.
“Ka sorkar kan sa shim biang ïa ka rai kaba kham bniah halor kane ka korphiw tad haduh ba ka jinglong jingman ha katei ka ri ba marjan ka la thanda,” u la bynrap.
Da kaba kyntu ïa ki nongshong shnong ka jylla kiba sah ha ki thain khappud ba kin ai ka jingïatrei lang bad ka sorkar, u Symbud Myntri Rangbah u la ong ruh, “ Nga kyrpad ïa baroh ki nongshong shnong ka jylla khamtam kito kiba sah ha ki thain khappud ba kin sngewbha ban ïaishah ïa ka sorkar na ka bynta kane ka korphiw namar ngim tip haduh mynta ïa ka jinglong jingman ha Bangladesh. Long ruh kiba kloi ban ïasam bad pyntip lada jia ba don kano kano ka jingjia namar na ka liang ka sorkar jylla kumjuh ki BSF ki don beit 24 kynta.”
La ïathuh ruh ba ka sorkar pdeng ka la dep ban buh haduh 9 pyrton ki shipai BSF ha shi lynter u pud u sam ha katei ka thaiñ na ka bynta ban tehlakam bad peitngor ïa ka jinglong jingman ha ka thaiñ hadien katei ka jingjia ha Bangladesh.
“Ka Tnad Kampohiing jong ka Ri ka la pyntikna ruh ban phah shuh shuh ki bor pahara namar ba ka jinglong jingman kam i long satia kaba itynnad,” u la ong haba bynrap “Ngi la bthah ïa u DIG ba un ïai pyntip sha ka sorkar jylla lada ki donkam kano kano ka jingkyrshan.”
Ha kajuh ka por u Bah Prestone u la pyntip ruh ba baroh ki nong India kynthup na Meghalaya ki la wanphai suk sha la ka ri.
“Ngim don shuh ki samla pule, kiba sahkut ha katei ka ri. Ainguh ïa U Blei la kumno kumno baroh ki samla pule ki la wanphai biang sha Meghalaya bad sha ki jaka jong ka ri India.”
Nalorkane, u Symbud Myntri Rangbah u ong ruh ba ka sorkar kan pyntreikam pura ïa ka Foreigner’s Act da kaba pynphai biang ïa ki briew kiba nabar ri lane pynngat kyndon ïa kum kitei ki briew lada ïoh bat.
Haba jubab halor ka jingkylli, u la ong ba namar kine ki jinglong jingman ïa mynta hi baroh ki kam khaii pateng bad ki kam shalar shabar ri la dei ban sangeh shwa.