Shillong, K’lyngkot, 25: Ka Meghalaya Human Rights Commission (MHRC) rynkat ka jingïatreilang bad ki bor synshar District bad ka ophis jong u Sessions Judge, West Garo Hills bad East Garo Hills District, ka la pynlong ïa ka Camp Sitting naduh ka 17 haduh ka 20 tarik mynta u bnai.
Ha kane ka Camp Sitting ne ka jingshong bishar, haduh 46 tylli ki Mukotduma la shim ban bishar ha kine ki saw sngi ryngkat ka jingïadon lang ki dkhot jong ka Commission, u PJP Hanaman bad i Kong B. Giri bad kiwei de ki nongtrei ka Commission. Ka jingthmu jong kane ka jingshim bishar ka Commission ban pynlong ïa kane ka Camp ka long ban pynsting ïa ka jingkit ba khia jong ki nongmudui bad kiba shah mudui ban leit hajir ïa ki mukotduma jong ki naduh Garo Hills shaduh Shillong, kaba ktah shibun ïa ka jinglut jingsep jong ki. Kiba bun ki paidbah kiba la ai jingmudui bad kiba shah mudui ki la wan sha kane ka jingbishar ha kaba weng noh ruh ïa kiba bun ki jingeh ne ki jingïakajia jong ki.
