Hiar ka Majistor ban tohkit halor ka kynnoh bamsap 1 klur ka skhim NABARD ha Shakhoikuna

Nongpoh, K’Lyngkot 29: Tang hadien ba ki paidbah ki la leit ban ujor syndon sha u Deputy Commissioner halor ka jingsuba ba ka lah ban don ka jingbam sap kaba shyrkhei halor ka jingpyntrei ïa ka skhim RIDF 2021-22 bala mang kumba 1 klur lyngba ka NABARD bala paw pyrthei ruh lyngba ka RTI bala wad da uwei u riew rangbah, na ka liang u DC ka Ri-bhoi mynta ka sngi u la phah ïa ka Majistor ban tohkit bad ban pynlong ka jingjurip ïa ka jingpyntrei ia katei ka skhim ha ka shnong Shakhoikuna ha Ri-Bhoi.
Haba kren sha ki lad pathai khubor na ka liang u Bah Barnabas Maring uwei na ki nongshong shnong jong ka shnong Shakhoikuna u la pynpaw ka jingsngewkmen hadien ba ka ophis u DC ka la shimkhia tang hadien ka jingleit ujor jong ki paidbah bala suba ba ka don ka jingbam sap ha ka jingpyntreikam ïa katei ka skhim bad khmih lynti ruh ba na ka liang ka ophis u DC kin ai ka jingbishar kaba hok.
Ha katei ka sngi la don ruh katto katne ngut ki rangbah kiba don kyrteng ha katei ka skhim ki la pynpaw pynban ïa ka jingbitar namar baroh shi sngi ki la pynlait por ban ap ïaki ophisar kiba wan jurip hynrei kim shym la poi satia ha ka jaka jong ki bala pynlong ruh ïaki ban suba sniew ïa u Rangbah Shnong u bala ïalam ïaki ophisar tang ha ki jaka bala sdang pyntrei ïaki skhim bad buhrieh ïaki jaka bym pat sdang eiei.
Shuh shuh la don ruh ki paidbah kiba kynnoh ba ka jaka jong ki ruh ka dei ban pyntrei lyngba katei ka skhim hynrei haduh mynta ym pat don dak eiei ban hap ban shu trei hi da ka pisa lajong, katba ïa ka pisa la dep ban pynlait naduh u snem 2022 kumba la paw pyrthei lyngba ka RTI.
Halor katei ka jingkynnoh ka jingdkhoh treikam katei ka skhim bad suba ka jingbam sap ba shyrkhei na ka liang ki paidbah kiba dei ban ïoh jingmyntoi ki la kyrpad ïa ka ophis u DC ban shimkhia ban pynlong ka jingtohkit kaba bñiah halor ka jingpyntreikam ïa katei ka skhim, khnang ba ki paidbah ba dei hok kin ïoh jingmyntoi.