Hiar jurip u President rangbah jong ka KSU ïa ka khyrdop talasi mynder ha Ratacherra EJHD
Maham jur ka KSU ïa ki mynder ri bad kumjuh ruh ïa ki Dalal myn die ri kiba pynrung beaiñ ïa ki dkhar Bangladesh sha kane ka jylla

Khliehriat nailar 9: U President rangbah jong ka Khasi Stidents Union Central Executive Council, u bah Lambokstarwell Marngar, lem bad ki dkhot jong ka KSU East Jaiñtia Hills District, mynta ka sngi ki la hiar jurip ïa ka khyrdop talasi mynder (Infiltration Chech Point) kaba don ha Ratacherra, na ka liang ka seng ka maham jur ïa kito ki mynder ri kiba wan rung beaiñ sha kane ka jylla bad kumjuh ruh ka seng ka maham ïa kito ki myndie ri kiba long dalal, kiba iarap ban pynrung beaiñ ïa ki dkhar bangla.
Haba kren sha ki pathai khubor, u bah Lambokstarwell Marngar, u la ong ba “Kaba la pynlong ïa ka seng baroh kawei ba ngin wan ha kane ka jaka ha Ratacherra ka long ba na ka por sha ka por ngi la ju pynsngew sha ka sorkar ïa ki aiñ ki kanun ban ïada ïa ban lait na kane ka jingwan rung kyrthep jong ki briew kiba na bar, ka jingdawa ILP ka la ïaid mynta la lai phew tylli ki snem bad ha u 2019 la pass ïa ka resolution, hynrei ka sorkar India ngam tip na kaei ka daw ba ka pynslem bad ka sorkar jylla ruh kam batai kam pynshai ba na kaei ka daw ba la pynslem, ka don ruh sa kawei ka aiñ kaba la pynlong doh long sanma myn ha ka 2016 kaba ngi tip kum ka Meghalaya Safty and Security Act ruh haduh mynta ngim pat sngewthuh sngewthaw, kumta ka pynlong ïa ngi kum ka seng ba ngi hap long shim khia ïa kane ka kam, te ka jingkylli mynta ka long ba tang kiba ïoh bat ruh katno ngut, sa kito ki bym ioh bat tip sa katno ngut, te kane ka pynlong ïa ngi ba ngin ïohi ba ka sorkar ka la shim sting haduh katta katta”
“Ngi sngewthuh ïa ki paralok, ki para doh para snam jong ngi kiba don duty hangne, teng teng ngi burom ïa ka kam ba ki trei, tangba kumba nga lap ba hangne ki dang don shibun bah ki jingduna, naduh ki insfrastructure, ki facilities ki dang duna, te ngin khmih lynti kumno haba tang 14 ngut ki nongtrei hangne kin leh duty ha ki 24 kynta, te kane ka dei ka jingbakla jong ka sorkar, kane ka kyrwoh sha ka sorkar ka long ba ngi la tyrwa ïa kita ki aiñ ruh ka dang leh sting bad ïa kane ka bor (infiltration) kaba la don lypa da ki phew tylli ki snem ruh ka dang pyn tlot kumne, kumta ngi shu phah ka kyrwoh sha ka sorkar ba kam dei ban sngew eiei lada ngi ngin shim ïa ka synjam ban plie ïa la ka jong ka khyrdop talasi mynder bad ban ïarap lang ïa kine ki pulit kiba don duty ha kane ka jaka ruh khnang ban pynkhlaiñ shuh shuh, namar ka long ka jingma kaba khraw ba kine ki briew kiba wan na Bangladesh kim don tang kata ka jingthmu ban pynbun khlieh hapoh ka jylla jong ngi, hynrei ki don da kawei ruh ka jingthmu kaba na sha lyndet” ong u bah Marngar.
U la pynpaw ruh ba u drok ba shyrkhei ruh u ïaid lyngba na kane ka jaka, ki kam khaiï kiba kynthup lang bad khaiï mrad bad khaiï briew ki ïaid nangne bad ong ba kane ka buh jingma haduh katta katta lada kita kiba halor kim ïohi jngi ïa kane namar ka buh jingma “Kaba pynkyndit ban ong ba ki ong ba ha Assam ki don kita ki kynhun lehnoh kiba na ri Bangladesh, kita ki Huji bad kiwei kiwei, kane ruh ka buh jingma, kumta lada ka khlaiñ kane ka jaka check (talasi), kumta ka lah ruh ban tehlakam ïa kiba bun bah ki kam sniew (crime) kiba wan shane ka jylla jong ngi, kumta nga kyntu ïa ka tnat kam poh iïng ban long peit ngor halor kane bad ka kyrwoh ba shai ka long ba ka sorkar ka dang slem ban pyntreikam ïa ka MMRSA ka dei ka aiñ jong ka sorkar jylla ai ba kum kane kan nym jia shuh nagne sha khmat bad ka dei ruh ban pynshai sha ki paidbah ka jylla ba kiei kita ki daw ba ka sorkar India ka dang pynslem ban pyntreikam ïa ka ILP, lada ka pynslem ka mut ba kam kheiñ snep ïa ka bor bad ka muhor jong ki 60 ngut kiba ki padibah ki la pynkup, wei ba ka resolution la dep pass ka mut ka dei kaba la khiathew haduh katta katta te lada kam ñiewkor ïa kata, ka mut ba kam kheiñ snep ïa ki 60 ngut, ngi ïohi ruh teng teng ba ki nongthaw aiñ ki la sdang ban ialehkamkai ïa ki mat (Issue) jong ka jaitbynriew, kahmtam ha kaba ïadei bad kane ka mat jong ka jingwan rung kyrthep ki mynder ri”
Na ka liang u Incharge jong ka Ratacherra Infiltration Chech Point, u bah L.Syiem, u la iathuh ba ki la don bun tylli ki case ba ka dep register ha kaba iadei bad ka jingioh kem ïa ki dkhar Bangladesh kiba wan rung beaiñ, ha kaba ïadei bad kito ki dkhar Bangladesh kiba la ioh bat da ki dkhot ka KSU u la pynshai ba ka sumo kaba kit ïa ki dkhar Bangla ha ka por ba ka ïaid lyngba na ka khyrdop na Ratacherra myn ha ka 20 tarik ka ïaid thylli yn don ba shnong, hynrei dei ha ka 22 tarik pat ïa katei ka sumo la ïoh bat na Dona da ki dkhot ka KSU, u la ong ba imat ka la don lypa ka jingiakut bad ki dalal, u la iathuh ba na ka liang katei ka tnat ka la trei shitom katba lah ban thlakam bad ban long peit ngor ïa ka jingwan rung ki mynder ri, ha kajuh ka por u la ong ruh ba ka tnat ka donkam ruh ka jingiatreilang bad ki dkhot ka seng ha kaba lada ki lap kin sngewbha ban bat bad ban ai jingtip sha ka tnat Infil bad iathuh ruh ba ka jingtalasi ïa ki sumo, ki night super bad ki kali ka long beit baroh ar phew saw kynta.
La ïa synran lang ha kane ka jingleit jurip jong u President ka KSU da u President KSU East Jaiñtia Hills District, u bah Strealmy.S.Suchen, u Vice President, u bah Satly Ryngkhlem,u Secretary, u bah K.S.Suchaing, u Finance Secretary, u bah Shaniahskhem Dkhar, lem bad kiwei kiwei kiba dei ki dkhot jong ka seng.