Hiar jurip ka Myntri ka koit ka khiah ban jurip ïa ki jaka ai jingsumar bym pat lah pyntreikam ha Ri Bhoi

Nongpoh, Jymmang 08: Ka Dr. Ampareen Lyngdoh myntri ka tnad ka koit ka khiah mynta ka hiar kala hiar shaka thaiñ Ri-Bhoi ban jurip ïaki jaka ai jingsumar bym pat lah ban pyntreikam ha Ri-Bhoi District ba kynthup ïaka MCH Hospital ha Umran Parila, ka Trauma Center ha Civil Hospital Nongpoh, ka ophis u DMHO bad kumjuh ruh ban peit ban khmih ïaki jingduna ha GNM School of Nursing kaba don ha Pahmsyiem.
Ha katei ka jingjurip la sakhi ruh da ka jingdonlang jong u Bah Mayral Born Syiem Chairman ka Advisory Board jong ka tnad ka koit ka khiah ba dei ruh u MLA ka Nongpoh, u Dr. Celestine Lyngdoh MLA ka Umsning, Arpit Upadhay Deputy Commissioner ka Ri-Bhoi District, u Dr. P Kharnary DMHO ka Ri-Bhoi District, ki ophisar naki tnad sorkar bapher bapher ban pynthikna ba ki jingdonkam baroh ha kitei ki jaka sumar ba shateng kin pynbiang bad pyndep noh.
Haba kren sha ki nongthoh naka liang ka kong Ampareen Lyngdoh kala ong ba kum ka Myntri kala shimkhia ban pynlong ka jingjurip ïaka MCH Hospital dei hadien ka dorkhas bala phah da ka seng HITO bad kumjuh ruh naka liang ka shnong hadien ba kum ki paidbah ka Ri-Bhoi kila kwah ba katei ka jaka sumar kan treikam noh naduh bala shna ïaka bad buh mawnongrim ha u snem 2017 kaba don ruh kumba 50 jingthiah, namar kumba long mynta katei ka jaka sumar kala dei kaba donkam eh ban pyntreikam noh naka bynta ki longkmie bad ki khyllung khynnah.
Kala ong ruh ba ka jingtei ha katei ka Hospital baroh kila dep lut bad sah mynta satang, ka light, ka um, ka surok, ha kaba kala kular ban pynsted noh ïaki jingdonkam baroh bad khmih lynti shuwa ka khristmas yn sa lah ban plie noh ïaka, namar ha katei ka sngi ka dang pynlong ka jingjurip bad kam lah ban pynurlong ïaka kam tang haka shisngi hynrei kala kular ban shimkhia ban pynsted noh mardor naduh ka thungkam thungjam ban buh ruh ïaki Doctor Specialist.
Shuh shuh halor ka Trauma Center naka liang ka kong Ampareen kala pynpaw ba katei ka kam kala ïaid shaid shaid hadien ba kala dep ban pynlong ka jingjurip kala pynpaw ruh ba katei ka trauma Center ka dei kaba donkam tam ban pyndep noh ïaka khamtam ba ka don harud surok bah National Highway, namar shibun ki jingjia aksiden bad kiwei kiwei ki jingjia ki ju jia man ka sngi bad jin ba katei ka trauma center kan treikam kala pynsuk bad kan long ka jingkyrkhu ïaki paidbah bad kumjuh ruh ka jingpynsted ban shna noh ïaka ophis u DMHO ha Nongpoh ban pynsuk ïaki nongtrei bad kumjuh ruh ki paidbah.
Kala ong ruh ba hadien ba kala dep ban jurip bad tohkit janai halor ki jinglong jingman jong kitei ki jaka sumar ki bym pat treikam ha Ri-Bhoi, kum ka myntri kan nym shong kli kti bad kular ruh ban buddien bad ban shimkhia ïa katei ka kam ba kitei ki kam baroh kin urlong noh shen naka bynta ka jingbit jingbiang jong ki paidbah ka dong Ri-Bhoi.