Khliehriat, Jymmang 8: Ki lai tylli ki sengbhalang kiba na ri lum Jaiñtia ba kynthup ka Jaiñtia Students Union, ka Jaiñtia Youth Federation bad ka East Jaiñtia National Council, mynta ka sngi ki la buh ïa ka jingthoh hakhmat u Deputy Commissioner ka East Jaiñtia Hills District, uba dei u Chairman jong ka Public Hearing, Myntdu Leshka Electrict Project ka ban long ha ka 10 tarik mynta u bnai ha shnong Bataw.
Katkum ka shithi ba la soi da u President ka JSU, u samla Jersom Syhylla, u President ka JYF-CB, u bah O.L.Tariang bad u President ka EJNC u bah Sambormi Lyngdoh, ki la pynpaw ba ki ai ka jingkyrshan kaba pura ïa kane ka public hearing Stage-II ha East Jaiñtia Hills District kaba dei ka shlem pynmih bor ding kaba yn sa pyntrei , ka ban long ka jingmyntoi ïa ka jylla hi baroh kawei.
La ong ruh ba ka Joint Action Committee jong kitei ki lai tylli ki seng, ki kyntu ïa ka Agency ka ban pyntrei bad ïa ka sorkar ba ki dei bad pyrkhat shwa ïa ki briew jong ka thaiñ ban pynioh kam iohjam ïa ki ha ka jingpyntrei ïa katei ka Project, la ka dei ki kam kiba rit (unskill) ne ki kam kiba heh (Skill), na ka byta ki kam kiba ïadei bad ki kor ki bor (Technical works) ruh ba kin sngewbha ban pyrkhat ban thep shwa da ki briew na ka thaiñ bad lada ki duna ki briew na ka thaiñ te ki lah ban wanrah ïa ki briew kiba na bar tangba ki dei ban da pynbiang ïa ki kot ki sla ba donkam, kum ki Labour license bad ki syrnot na ki bor kiba halor.
Ka JAC ka ong ruh ba kane ka Project ka dei ban wanrah jingmyntoi nyngkong eh ïa ki nongshong shnong jong ka thaiñ bad kumjuh ruh ïa ki briew jong ka West Jaiñtia Hills District bad ka East Jaiñtia Hills District.
Ha kaba ïadei bad ki kam ban pynroi bad ban kyntiew ïa ka thaiñ, ka JAC jong kitei ki sengbhalang, ka kyntu ruh ïa sorkar bad ïa ka Agency ka ban pyntrei ba ki dei ban kynthup lang ruh ïa ka shnong Borghat kaba don ha khappud namar la sngewthuh ba ka shnong Borghat ruh kan sa shah ktah ha kane ka jingpyntrei ïa kane ka dam ne ka project pynmih bor ding.
