Noh synñiang ka tnat CSR jong ka company Star Cement da ki tiar skul bad ki tiar ïalehkai sport sha ki khatsaw tylli ki skul ha Narpuh

Khliehriat jymmang 8: Ka Company dewbilat jong ka Star Cement lyngba ka tnat CSR, mynta ka sngi ka la noh syniang da ki tiar skul sha ki khynnah skul bad ki tiar ïalehkai sport bapher bapher sha ki khatsaw tylli ki skul kiba Don ha Narpuh, ïa kine ki tiar la aiti sha ki nongpynïaid shnong bad sha ki nongpynïaid jong ki skul, ïa ka jingïalang la pynlong ha Star Club jong ka Company ha Lumshnong bad la pynïaid ïa ka prokram da u General Manager CSR Star Cement, u Kingshok Borah.
Ki khatsaw tylli ki skul kiba la ïoh ïa ka jingnoh jingïarap ki dei ki skuk kiba na ka shnong Khaddum, Brichyrnot, Tongseng, Lumtongseng, Sakhri bad Lumshnong.
Na ka bynta ki khynnah kiba don haduh 1345 ngut la ai sha ki mar kawei ka pla kot, ki bilor um dih, ki pencil box, ki geometrical box bad ka shatri, na ka bynta kitei ki khatsaw tylli ki skul la ai da ki ben ban shong bad ban thoh (bench & desk), ki tiar ïalehkai sport ba kynthup ki tiar ïalehkai criket (criket set), ki ball na ka bynta ka footbal bad volleyball, ki Discus Throw, ki shot put, ki chess.
La ong ruh ba ka CSR jong katei ka company kan sa noh syniang sa btenh ïa ka jingkyrshan Kum kane ka jingnohsyniang sa ïa ki khatsaw tylli ki skul ha kine ki sngi ki ban wan.
Haba kren ha ka jingïalang, u Unit Head jong ka company Star Cement Lumshnong, u Luxmiah Manjula, u la ong ba ka company ka ju pyrkhat man ka por ban kyntiew ïa ki khynnah pule bad ruh ban kyntiew ïa ki skul bad na ka por sha ka por ka company ka theh ki jingïarap ban kyrshan ïa ki skul, ïa ki khynnah bad kumjuh ruh ïa ki shnong ki thaw bad lyngba ka tnat CSR yn dang ïai bteng ruh ïa ka jingtheh jingïarap ban kyntiew ïa ki shnong ki thaw bad ban kyntiew ïa ki khynnah skul.
U Senior Manager (ADM) Star Cement, u Siddharth Banerjee, u la ong ba ka Company ka ju ai ki jingkyrshan ïa ki shnong ki thaw, kumjuh ruh ïa ki skul bad ki khynnah skul ban kyntiew ïa ki shnong bad kumjuh ruh ban kyntiew ïa ki skul bad ki khynnah bad ïa kiba kum kine ki jingkyrshan ka company kan nang ïai bteng na ka por sha ka por na ka bynta ka jingbit jingbiang ki shnong ki thaw bad ki skul ha ka thaiñ.
U Kingshok Borah, u la ong ba ïa kane ka jingai jingkyrshan jong ka tnat CSR la sdang naduh u snem 2018 bad yn dang ïai bteng ban ai ki jingkyrshan, u la ong ruh ba shen ka tnat kan sa pynlong ruh ïa ka jingthoh examination na ka bynta kito ki khynnah ki ban ïoh ïa ka jingkyrshan kum ka Scholarship na ka company kumba ju leh man la u snem, kiba pass bha ha ka kyrdan ba nyngkong kin ioh ïa ka khung pisa kaba T50,000 hajar tyngka, kiba wan ha ka kyrdan ba ar kin ioh T30,000 hajar tyngka bad kiba wan ha ka kyrdan ba lai kin ioh T15,000 hajar tyngka bad kane ka Star Scholapship ka long kum ka jingkyrshan bad jingiarap ïa ki khynnah ba kin bteng shuh shuh ïa ki jingpule Jong ki kiba kham shalor.