Nongpoh, Jymmang 08: Kumba ka Wah Umran kaba don ha syndah jong ka surokbah National Highway-6 ha Ri Bhoi, ka dei kawei na ka wah kaba ki paidbah ha shi lynter jong ka wah ki pyndonkam na ka bynta ban sum ban sait bad ka dei ruh ka wah ba dang bun ki jaid doh um kiba dang im ha kane ka wah, ka Ri Bhoi Youth Federation (RBYF) Umran Unit mynta ka sngi ka la pynmi ïa ka jingmaham kaba jur ïa ki paidbah kiba pyntuid jaboh ne bret ïa ki jaboh sha kane ka wah.
Kum ban pynkynmaw, ha ki snem ba la leit noh ka RBYF Umran Unit ka la ju mana ruh ïa ki paidbah ban bret jaboh ne pyntuid ïa ki jaboh sha ki wah bad ka la don ruh ka khep ba kum ki nongïalam ka RBYF kila mih paidbah ban pynkhuid ïa kane ka wah da ka jingthmu ban sumar bad ban ïada ïa ka khuid ka suba jong kane ka wah kaba dei kawei na ka wah kaba ki paidbah ki ioh jingmyntoi na ka bynta ban sum ban sait bad kiwei kiwei ki jingdonkam ban wan rah ïa ka khuid ka suba ha ïing ha sem.
Haba ïa kren mynta ka sngi bad u General Secretary ka RBYF Umran Unit, u bah Amjester Papang, u la ong ba ka seng RBYF ka don ka jingsngewkhia kaba jur ban pynjaboh ïa kane ka wah bad kum ka seng kam kwah ruh ba kane ka wan kan kylla long kum ka Wah Umkhrah kaba la dap da ki jaboh suda bad ban ïada kyrpang ïa kane ka wah ka seng ka maham jur ïa ki paidbah nongshong shnong ba ki dei ban pyntuid jaboh sha ki wah lane ban bret jaboh shapoh ka wah.
U la ong ruh ba kane ka jingmaham kam dei satia tang ïa ki paidbah nongshong shnong ka Umran bad ki shnong ba marjan kiba don ha jan kane ka wah bad kynthup ruh ïa ki paidbah nongleit nongwan lyngba ka surokbah National Highway-6 ba kim dei ban bret jaboh sha kane ka wah bad lada ka seng ka lap kan shim da ki lad ba tyngeh ban aiti sha ki bor ba dei peit dei khmih ïa ka khuid ka suba jong ka sorkar jylla.
“Ka seng ka sngewkhia ruh ban ïada ïa kane ka wah kam dei satia tang na ka bynta ka jingkhuid jingsuba jong ka wah bad ka seng ka da mana tyngeh ruh ïa ki paidbah ba kim dei ban kawang jar ne wieh dawai ba pyniap ïa ki dohkha dohpnat kiba don hapoh jong kane ka wah” ong u Bah Papang bad bynrap ruh halor kane ka bynta ruh ka seng kan peitngor bad lada lap ïa kiba wieh dawai ne kawang jar ka seng kan ati sha ki bor dei peit ban pynshitom ne pynsajia” u la bynrap.
Shuh shuh, ban ïada kyrpang ïa kane ka wah ba kan long ka wah kaba khuid kaba suba, ka seng RYBYF ka kyntu jur ïa ki paidbah nongshong shnong bad wat ki nongleit nongwan ruh ba kin ai ïa kata ka jingïatrei lang ban ïada ïa kane ka wah bad khlem pep lada don shisha ka jingïatrei lang ngin lah ban pynneh pynsah ïa ka khuid ka suba ka wah bad ruh ban ïada kyrpang ïa baroh ki kynja doh um kiba im ha kane ka wah, u la bynrap.
