Halor ka jingsniew u drok bad kiwei de ki jingdih pynbuaid pynlong prokram ka JHDS

Jowai, Jymmang 08: Ka Jaiñtia Hills Development Society (JHDS) ha rynkat ka jingïatreilang bad ka Ophis jong ka District Social Welfare Officer ka West Jaiñtia Hill, mynta ka sngi ka la pynlong ïa ka awareness prokram ha Skul Tpep-pale Secondary School, Jowai.
Kane ak prokram ka long shi bynta ban pynshai ha ki khynnah skul halor ki jingma u Drugs ka kiad bad kiwei de ki jingdih pynbuaid kiba la jyllei bha hapoh ka sor Jowai.
Ha kane ka sngi la ïoh ruh ïa ka jingbatai halor ka Nashamukt Bharat Abhiyan, kaba dei ka skim jong ka Sorkar Kmie ban pynduna ïa ka jingdih drugs ïa kaba la ai jingbatai da ka kong J. Synnah, District Social Welfare Officer West Jaiñtia Hills.
Ka kong J. Synnah ka la ong ba ki don haduh 272 tylli ki District ha baroh kawei ka Ri India kiba la ñiew ba ki dei ka District kiba kynrei palat ka jingdih drugs bad ka West Jaiñtia Hills District ka dei kawei na kita ki District.
Shuh shuh ka la ong ba ka Sorkar ka ka pyrshang ban rat dieng khong ïa kane ka jait jingpang ba shyrkhei lyngba ki skim bapher bapher bad ka Nashamukt Bharat Abhiyan kadei kawei ka thong kaba ka Sorkar India ka la ïaleh katba lah ban pynduh jait ïa kane ka jingmlien basniew.
La ïoh shuh shuh ïa ka jingbatai babniah halor ka jingktah u drugs bad ki jingdih pynbuaid ïa kaba la ai da u Bah Terence Sawian, uba dei u wei na ki riewshemphang ba la tbit bha ha kane ka phang.
Ha kane ka sngi la pyniphuh iphieng bad pynkham ngam jylliew shuh ïa ka jingma jong u drug lyngba ka drama lyngkot da ki khynnah skul jong ka Tpep-pale Secondary School Jowai.
Shuwa kane ka prokram la don ruh ka jingïaid rally halor kajuh ka phang ba la ïashym bynta da ki kynnah skul jong katei ka skul ïa kaba la sdang na ka shnongTpep-pale, Dulong, Iongpiah, Pohskur bad pynkut hapoh phyllaw jong kane ka Skul.