Sieh mawpud jubor ka Sorkar Assam ha ka shnong Noapara bad Dronpara, jynrat ki paidbah

Nongstoiñ, Jymmang, 8: Ka jingpynbeit hapdeng ki ar sorkar ban iakren pynbeit pud jong ka wat ka ba-ar ka dang iaid shaid shaid, hynrei ka Sorkar Assam ka la nang iaid shakhmat la ki kam beain jong ka da kaba kyntur ia u pud ha ki shnong khappud ka West Khasi Hills. Dang ha kine ki khyndiat sngi, ki briew jong ka sorkar Assam ha ryngkat ki pulit ki la wan kiew ban sieh mawpud (pillar) ha ki ar tylli ki Shnong ban kam longtrai ia kine ki Shnong.
Kine ki shnong kiba la wan sieh mawpud da ka Sorkar Assam ka la jia ha ka Shnong Noapara bad ha Dronpara. La ong da ki trai shnong ba ka Sorkar Assam ka la shu sieh jubor ia kine ki mawpud khlem ka jingtip jong ki bor Shnong, lane khlem pyntip iano iano ruh.
Mar ia ioh jingtip ia kane, na ka liang ki nongialam ka seng Federation of Khasi Jaintia & Garo People bad ka Khasi Students Union ka West Khasi Hills, hynne ka sngi ka 8 tarik Jymmang, ki la hiar leit jurip ia kine ki mawpud ha Noapara bad Dronpara bad iakynduh ruh ia ki bor Shnong ban ai mynsiem ba kin ym duh jingkyrmen na kane ka jingwan pynibor ka Assam.
Ki Nongialam jong kine ki Seng ki la iakynduh ruh ia ki Rangbah Shnong ka Naopara, Komphaduli, Dronpara bad ki shnong ba marjan ban iaphylliew jingmut bad ban wad bniah halor kane ka kam beain jong ka Sorkar Assam. Don ruh napdeng ki riew paidbah kiba la ialam sha katei ka jaka ba sieh mawpud, tangba ki la don ki riew paidbah kiba ym tip mano, kiba la rat dep noh ia kitei ki mawpud ba la wan sieh jubor da ka Assam.
Na ka liang ki bor shnong ki la pynpaw hakhmat ki nongialam jong ki ar Sengbhalang, ba kane ka jingpynibor jong ka Sorkar Assam ka dei kaba ju jia man la ka por. Ki pyntip ba ki Pulit ka Sorkar Assam ki ju pynthut ruh man ka por ia ki nongshong shnong, khamtam ki nongrep haduh ba don u pud ba kin knieh wat ia ki mohkhiew, ki wait bad kiwei kiwei nalor ka jingdawa pisa jubor.
Kine ki ar seng ki la ai mynsiem ia ki nongshongs hnong ka thain ba kin ieng iatylli kawei bad ban ialeh pyrshah ia kane ka jingleh beain ka sorkar Assam. Haba kular ruh ba ki ar seng kin iai don ryngkat bad ki nongshong shnong ha kano kano ka jingeh ba ki iakynduh.
Ha kajuh ka por, kine ki ar tylli ki Seng kila dawa ia ka Sorkar Meghalaya Democratic Alliance (MDA)-2, ba kam dei shu sngap ia kane ka jingkyntur pud ka Assam ha kine ki Shnong bad ka jingleh riew khlaw na ka por sha ka por, khlem da burom shuh ia ka soskular status quo.
Ki nongialam jong ki ar seng ki la maham ruh ia ka Sorkar Assam ba kam dei ban mushlia than ia u pud u sam ka Jylla. Ha kajuh ka por ka kyntu ia ka Sorkar Meghalaya ba kan pynbeit mardor ia kane ka kam, lym kumta ki ar seng kin hap ban mih shakhmat ban iada ia la u jong u pud u sam.