Nongstoiñ, Jymmang 8: Ka jingïai bteng jong kawei ka Kompeni ban ksam marpoh khyndew ha Mawlangria, ka la pynlong ïa ki paidbah ka shnong Mawmluh II bad Urkhli ban mih shakhmat ban pyrshah ïa katei ka jingksam marpoh khyndew. Hynrei ha kine ki sngi ka jingpyrshah ka la nang jur, namar sa ki sordar jong hynñiew tylli kiwei pat ki shnong ryngkat ki nongïalam jong ka Khasi Student Union bad Federation of Khasi Jaiñtia & Garo People Rambrai circle, ki la mih shakhmat ban ai ka jingkyrshan ba pura ïa ki sordar bad ki paitbah shnong bad ban ïa snohktilang ban ym ailad ban ksam marpoh khyndew na katei ka jaka.
Hynne ka sngi 8 tarik u Jymmang, na ka liang ki sordar jong ki hynñiew tylli ki shnong ka Mawthaw, Mawmluh II, Urkhli, Mawliehpoh, Umsiej, Lawdibah bad kiwei kiwei ki shnong, ryngkat ki nongïalam jong ka FKJGP bad KSU Rambrai circle, ki la pynlong ka jingïakynduh lang ha Mawthaw ban ïatai halor katei ka jingbym sngap jong ki nongpyntrei ïa katei ka jingksam marpoh khyndew ha katei ka jaka.
Ha ka jingïalang ba la pynïaid da u bah S.Myrthong sordar jong ka shnong Mawthaw, la ïoh ïa ka jingtai bad phylliew jingmut kumno kin leh ha kaba ïadei bad katei ka mat. Na ka liang ki longkmie bad ki nongshong shnong jong ka Urkhli kiba la ïadon lang, ki la ong ba lada katei ka jingksam marpoh khyndew ha Mawlangria kan ïai bteng, ki paitbah jong kitei ki shnong kim nud shuh ban pyndonkam ïa ka umbam umdih kaba la ring na jan katei ka jaka.
Kawei ka longkmie ka la pynshai ba ka um ka la kylla rong stem, ban dih ruh kam long shuh namar ka long khleiñ kumba theh da ka petrol ne umphniang sharak. Uwei u nongshong shnong jong ka shnong Urkhli u la ong ba kaba lyngngoh ka long ba naduh ba la sdang ban ksam marpoh khyndew ha katei ka jaka, ki khynnah khunlung ki shu at ki ngap bad mih ki kynja ba at kum ki glan bad don uwei u khynnah ha shnong Urkhli u ba pdiang um na u pipe bad dih bad haka por janmiet u ring kyllut ki shkor bad haduh mynta la ar taïew tam um pat ïoh snew satia.
Ka kmie jong utei u khynnah ruh ka la ïathuh ba ka long hi kumta bad haba pyrshang ban kren ruh um ïohsngew satia bad kyrngah khlieh. U bah Trowel Kharjahrin sordar sordar jong ka shnong Mawliehpoh haba ïakren bad u nongthoh khubor hadien ba la wai ka jingïalang, u la ong ba ha kaba nyngkong ki la ïoh jingtip ba ka umbam umdih ha shnong Mawmluh II bad Urkhli ka la jngut da ki sah da ki taïew. Hynrei kim shym poi pyrkhat ba ka dei na ka jingksam marpoh khyndew ha katei ka jaka.
Hadien ba u la ïakynduh ïa ki sordar jong kitei ki ar tylli ki shnong bad ki la kyrpad ïa u bad kiwei pat ki sordar lem bad ki paitbah ba kin ïashimbynta lem ban pyrshah, kumta ki la shimkhia namar ba ki la sngewthuh shai ba katei ka jingksam marpoh khyndew kam long kaba bha bad ka lah ban buh jingma ïa ka koit ka khiah ym tang jong kitei ki ar shnong hynrei ïa ki paitbah ka thaiñ hi baroh kawei.
U la ong ruh ba ha katei ka jingïalang ki paitbah jong kitei ki hynñiew shnong ryngkat ki sordar, da kawei ka jingmut ki la rai ba kin ym shah da lei lei ban ksam marpoh khyndew ha katei ka jaka. Nalor kata ha katei ka sngi ka jingïalang ka la ïakut ban leit buh biang da ka dorkhast ha u Deputy Commissioner ka West Khasi Hills ha ka sien kaba lai, ba un paha pynsangeh mardor ïa ka jingksam marpoh khyndew ha katei ka jaka.
Ki la rai ruh ban ai por tang sawphew phra kynta ba un pynsangeh bad lada um lah ban pynsangeh, kim banse ban shim da kiwei pat ki sien jam kiba kham tyngeh, kampher wat lada kan poi ha uno uno u pud ruh bad lada jia ei na ka liang ki sordar bad ki paitbah kin ym kit khlieh.
